Միացյալ Նահանգները և Սաուդյան Արաբիան դիմել են ՄԱԿ-ի Անվտանգության խորհրդին Իրանի նկատմամբ նոր պատժամիջոց կիրառելու պահանջով

Միացյալ Նահանգները Իրանին մեղադրում են ԱՄՆ–ում Սաուդյան Արաբիայի դեսպանի մահափորձի դավադրության մեջ:

Բարաք Օբաման հեռախոսազրույց է ունեցել Սաուդյան Արաբիայի թագավոր Աբդուլայի հետ և երկուսն էլ համաձայնել են գործը հանձնել ՄԱԿ-ի Անվտանգության խորհրդին, քանի որ սա հարձակում է ԱՄՆ-ում օտարերկրյա դիվանագետի վրա:

ԱՄՆ պետքարտուղար Հիլարի Քլինթոնը հայտարարել է, որ Իրանում նկատվում է տեռորիզմի հովանավորչության կանխատեսելի վտանգավոր աճ: Նա ասել է, որ Իրանը պետք է պատասխանատվություն կրի իր կատարած գործողությունների համար և ԱՄՆ-ն արդեն Իրանի դեմ նոր պատժամիջոցներ կիրառել ու ուղիներ է փնտրում:

Չորեքշաբթի օրը ԱՄՆ ֆինանսների նախարարությունը պատժամիջոց էր կիրառել Իրանական Մահան Էյրավիա ընկերության նկատմամբ, պատճառաբանելով, որ ավիաընկերությունը գաղտնի կերպով տեղափոխել է Իրանական հեղափոխական գվարդիայի միավորումներից մեկի' Ալ-Կղուդսի անդամներին:

Պաշտոնական Իրանը կտրուկ ժխտում է միջադեպին իր մասնակցությունը, որակելով Վաշինգտոնում Սաուդյան Արաբիայի դեսպանի մահափորձի մեջ Իրանին մեղադրելը, որպես մանկական, սիրողական խաղեր և շինծու մեղադարանք:

ԱՄՆ իշխանությունները հայտնել են երկու կասկածյալների` Իրանի և ԱՄՆ–ի քաղաքացիություն ունեցող Մանսոր Արբաբսիարի և իրանաբնակ, Ալ-Կղուդս միավորման անդամ Ղոլամ Շակուրիի անունները: