Էդվարդ Նալբանդյանը հանդիպել է Իտալիայի ԱԳ նախարար Ջուլիո Տերցիի հետ

Դեկտեմբերի 13-ին ԱԳ նախարար Էդվարդ Նալբանդյանը, ով Հռոմում է գտնվում աշխատանքային այցով Իտալիա ժամանած Հայաստանի Հանրապետության Նախագահին ուղեկցող պատվիրակության կազմում, հանդիպեց Իտալիայի ԱԳ նախարար Ջուլիո Տերցիի հետ:

«Ես ուրախ եմ հանդիպել Ձեզ Հռոմում և անձամբ շնորհավորել արտգործնախարարի պաշտոնում նշանակվելու կապակցությամբ: Վստահ եմ, որ համատեղ ջանքերով մենք կկարողանանք առավել խորացնել մեր երկու երկրների միջեւ փոխշահավետ համագործակցությունը», - ասաց Էդվարդ Նալբանդյանը:

Զրույցի ընթացքում երկուստեք նշվեց, որ հայ-իտալական հարաբերություններն ունեն հազարամյակների պատմություն, որը հիշարժան է բարի ավանդույթներով եւ փոխադարձ բարեկամության դրսեւորումներով, և այդ ամենը ամուր հիմք է ստեղծում հարաբերությունների առավել ամրապնդման և խորացման համար:

Հայաստանի և Իտալիայի արտգործնախարարներն անդրադարձան հայ-իտալական քաղաքական, առեւտրատնտեսական և մշակութային հարաբերությունների զարգացման, իրավապայմանագրային դաշտի ընդլայնմանն առնչվող հարցերի:

Մշակութային փոխանակումների տեսանկյունից նախարար Նալբանդյանը կարևորեց Հռոմում «Դվին. Հայաստանի մայրաքաղաքը Եվրոպայի և Ասիայի միջեւ» և Վենետիկում «Հայաստան. Քաղաքակրթության դրոշմներ» ցուցահանդեսների անցկացումը և շնորհակալություն հայտնեց Իտալիայի կառավարության աջակցությամբ` Հայաստանում մշակութային արժեքների վերականգնողական կենտրոնի հիմնադրման համար:

Բանակցությունների ընթացքում քննարկվեցին Հայաստան - Եվրոպական միություն համագործակցության տարբեր ուղղությունները, Եվրոպական հարեւանության քաղաքականության եւ Արևելյան գործընկերություն ծրագրի շրջանակներում իրականացվող նախագծերը:

Հայաստանի և Իտալիայի արտաքին քաղաքական գերատեսչությունների ղեկավարներն անդրադարձան միջազգային և տարածաշրջանային խնդիրների: Այս համատեքստում արտգործնախարար Նալբանդյանը ներկայացրեց Լեռնային Ղարաբաղի հիմնախնդրի խաղաղ կարգավորման գործընթացի վերջին զարգացումները: