Վրաստանի արտակարգ և լիազոր դեսպանն իր գոհունակությունն է հայտնել՝ ՀՀ ոստիկանությունում ընթացող բարեփոխումների կապակցությամբ

Դեկտեմբերի 13-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն ընդունեց Հայաստանի Հանրապետությունում Վրաստանի արտակարգ և լիազոր դեսպան Թենգիզ Շարմանաշվիլուն:

Հանդիպման սկզբում ոստիկանության պետը նշեց, որ հայ-վրացական հարաբերությունները ժամանակի փորձություն անցած, դարավոր եղբայրական հարաբերություններ են, և համագործակցությունն ու գործընկերությունը մեր երկրների միջև առաջիկայում պետք է ավելի խորանան ու ընդլայնվեն:

Վլադիմիր Գասպարյանը ներկայացրեց Հայաստանի ոստիկանությունում ընթացող բարեփոխումները, ձեռքբերումներն ու անելիքները, նոր մոտեցումները, որոնց կենսագործումով միայն կառույցի գործունեությունը կբավարարի ժամանակի պահանջները:

Անդրադառնալով Վրաստանի ոստիկանության բարեփոխումներին` ոստիկանության պետը նշեց, որ այդ գործընթացը բավական հետաքրքիր, ընդունելի և ուսանելի է:

Շնորհակալություն հայտնելով ջերմ ընդունելության համար` Թենգիզ Շարմանաշվիլին նշեց, որ իր գործունեության ընթացքում երկու անգամ է ականատես եղել ոստիկանական կառույցի բարեփոխումների, նախ` Վրաստանում, հիմա էլ` Հայաստանում:

Դեսպանը գոհունակություն հայտնեց ՀՀ ոստիկանությունում ընթացող բարեփոխումների կապակցությամբ` ընդգծելով, որ հարևան Վրաստանը շահագրգռված է հայ ոստիկանների արդյունավետ աշխատանքով: Անդրադառնալով ոստիկանական ոլորտում հայ-վրացական համագործակցությանը` Թենգիզ Շարմանաշվիլին նկատեց, որ այն բարձր մակարդակի է, ինչը վկայում են կոնկրետ հանցագործությունների բացահայտումները: Ցանկալի է, նշեց դեսպանը, որ հայ և վրացի ոստիկաններն առաջիկայում առավել ակտիվացնեն փոխայցելություններն ու փորձի փոխանակումը, ինչը թույլ կտա ավելի բարձր արդյունքներ արձանագրել հանցավորության դեմ համատեղ պայքարում:

Հանդիպման ընթացքում քննարկվեցին փոխադարձ հետաքրքրություն ներկայացնող այլ հարցեր ևս: