Երկրապահին, կամավորական ջոկատներին խնդիր ենք տվել՝ ամեն պահի պատրաստ սպասել. Սյունիքի մարզպետ

Գյուղերում երկրապահին խնդիր ենք տվել՝ պատրաստ սպասել։ Այս մասին ԼՈՒՐԵՐ․com-ի թղթակցի հետ զրույցում ասաց Սյունիքի մարզպետ Մելիքսեթ Պողոսյանը՝ նշելով, որ Սյունիքի  գյուղերում կամավորական ջոկատներ են կազմվում։ 

«Այս պահի դրությամբ Սյունիքում նորմալ իրավիճակ է, բայց երկրապահներին, կամավորական ջոկատներին խնդիր ենք տվել ամեն պահի պատրաստ լինել։ Մեր հատվածում՝ Գորիսում, ամեն բան նորմալ է, հյուսիսային մասն է, լարվածությունն այդտեղ է», - ասաց Մելիքսեթ Պողոսյանը՝ հավելելով, որ կոնկրետ տեղանուններ և հատվածներ չի կարող նշել, ճշտումներ պետք է կատարել ՊՆ-ից։

Ինչ վերաբերում է Իշխանասարին և մյուս հատվածներին՝ Մելիքսեթ Պողոսյանն ասաց, որ կապ չկա, հետևաբար չեն կարողանում որևէ բան ճշտել։

Հիշեցնենք, որ այսօր՝ ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ Նրանք կիրառում են հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Հայկական կողմը դիմել է համարժեք գործողությունների։ 

Ըստ մամուլում տարածված տեղեկութունների՝ հայկական կողմն ունի 10 զոհ, գերեվարվել է 6 հայ զինծառայող, ունենք 2 մարտական դիրքի կորուստ: Սակայն, ՀՀ պաշտպանության նախարարությունը հայտնել է, որ հայկական կողմն ունի 4 վիրավոր, իսկ զոհերի և այլ վիրավորների մասին տվյալները ճշտվում են։