Հալիձորի հետքերով

Նախորդ օրը հրապարակել էինք մի հոդված՝ Անասնագոմի են վերածել Հալիձորի բերդը (ֆոտոշարք), որի արձագանքը միանգամից ստացանք, նամակը ներկայացնում ենք ստորև.

Հալիձորի բերդն ունի մշտական պահապան եւ այն անասնագոմի չի վերածվել։
Սյունիքի մարզի պատմության եւ մշակույթի անշարժ հուշարձանների պետական ցուցակում հաշվառված է շուրջ 2840 հուշարձան, որոնց պահպանությունն իրականացվում է «Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի Սյունիքի մարզային ծառայության պահապանների կողմից։

 Լուսանկարները, որ տեղադրված են կայքում արված են հավանաբար երկու երեք տարի առաջ, երբ իսկապես խնդիր եղել է։ Իրավիճակը շտկելու, բերդի տարածքում մշտապես աշխատակից ունենալու նկատառումով, ՊՈԱԿ-ի տնօրենի հրամանով Հալիձորի հուշարձանի պահապան է նշանակվել։ Վստահեցնում ենք, որ բերդը եւ ամբողջ տարածքը գտնվում է մեր պահապանի՝ Սերժիկ Ալեքսանյանի ամենօրյա ուշադրության կենտրոնում եւ ներկայում բացառվում է կենդանիների մուտքն այնտեղ։ Հալիձորի բերդի տարածքը մաքուր է և բարեբախտաբար «անասնագոմի» չի վերածվել։

Հավելենք, որ ՊՄՊ մարզային ծառայությունը հուշարձանների պահպանության ու մաքրման աշխատանքների շրջանակում սերտորեն գործակցում է հասարակական կազմակերպությունների հետ։ Մասնավորապես «Դավիթ բեկյան ուխտեր» հ/կ հետ վերջերս մաքրման աշխատանքներ են իրականացվել բերդի տարածքում։

Ի դեպ, Հալիձորի բերդի տարածքում 2006-2009 թթ. վերանորոգման աշխատանքներ են իրականացվել պետբյուջեով։ Նորոգվել են բերդի արևելյան, հյուսիս-արևելյան պարիսպները, կից շինությունները, Ս. Աստվածածին եկեղեցին։

Իհարկե, մեզ համար ուրախալի է այն, որ այսօր հրապարակում ենք այս հերքման տեքստը, քանի որ պետք է միանշանակ մեծ ուշադրություն դարձնել մեր պատմամշակութային արժեքներին, չնայած այն հանգամանքին, որ այդ լուսանկարները այդքան վաղեմություն չունեին, և Հալիձորը նկարագրվածի չափ մաքուր ու խնամված չէ այսօր։