Գյումրու քաղաքապետարանի հեռախոսավճարի պարտքը` 2 727 431 դրամ

«Գյումրի-Ասպարեզը» սեպտեմբերի 25-ի համարում անդրադարձել էր քաղաքապետարանի աշխատանքային հեռախոսների հետ կապված խնդրին. արդեն մի քանի օր է, ինչ դրանք չեն աշխատում: Հարցի վերաբերյալ պարզաբանում տալով՝ քաղաքապետարանի մամուլի քարտուղար Լիլիթ Աղեկյանը նշել էր, որ հեռախոսների չաշխատելու պատճառը տեխնիկական է: Այնուամենայնիվ, որոշակի դժվարությամբ, մեզ հաջողվեց պարզել, որ հեռախոսներն անջատված են պարտքերի պատճառով եւ այն կազմում է 2 727 431 դրամ: Անզեն աչքով էլ պարզ է' տեխնիկական պատճառը, ակնհայտորեն, տարբերվում է լուրջ ֆինանսական խնդրից:

Այս անգամ մենք արդեն ոչ թե փորձեցինք պարզել ինչ-որ բան, այլ ուղիղ ասացինք Լիլիթ Աղեկյանին քաղաքապետարանի՝ հեռախոսակապի համար ունեցած պարտքի մասին, ինչին նա պատասխանեց. «Տեսնու՞մ եք՝ դուք մեզանից ավելի լավ եք ինֆորմացված, բայց այս երկու օրվա մեջ այդ հարցերը, ես ասում եմ տեխնիկական հարցերը, լուծված կլինեն: Հիմա Դուք ինձանից ի՞նչ եք ուզում»: Մեր այն խոսքին, թե տեխնիկական հարցերը եւ պարտքերը տարբեր բաներ են՝ քաղաքապետարանի մամուլի քարտուղարը արձագանքեց. «Հանգիստ եղեք, շնորհակալ ենք, որ Դուք մեր մասին այդքան շատ մտածում եք՝ բոլոր հարցերը կլուծվեն»:

Հիշեցնեմ, որ 2 օր առաջ մեզ քաղաքապետարանից արդեն ասել էին, որ խնդիրը 1-2 օրից կլուծվի: Ինչպես տեսնում ենք, խնդիրը՝ 2 727 431 դրամ պարքի տեսքով, դեռ չի լուծվել: Շատ հնարավոր է, որ այդ 1-2 օրը ձգվի, ասենք, 1,5 ամիս՝ մինչեւ որ Գյումրու նոր քաղաքապետը ստանձնի պարտականությունները՝ արդեն հայտնի ու չլուծված խնդիրներով, անհայտ, բայց արդեն բացահայտվող բավականին լուրջ պարտքերով: Իսկ թե ե՞րբ ու ինչպե՞ս կլուծվեն հարցերը, կամ՝ կլուծվե՞ն, թե՞ ոչ՝ դժվար է ասել: Սպասենք՝ տեսնենք:

Ալիսա Հակոբյան

shirakcentre.org