«Հայկական ժամանակ». Վարդան Օսկանյանի դեմ խափանման միջոցի հարց չի բարձրացվել

Երեկ ՀՀ գլխավոր դատախազ Աղվան Հովսեփյանը միջնորդագիր է ներկայացրել ԱԺ՝ ԲՀԿ-ական պատգամավոր Վարդան Օսկանյանին ԱԱԾ-ում հարուցված փողերի լվացման գործով որպես մեղադրյալ ներգրավելու համաձայնություն ստանալու համար: Գլխավոր դատախազի մամուլի խոսնակ Սոնա Տռուզյանը «Հայկական ժամանակ»-ի թղթակցին հայտնել է, որ միջնորդագիրը վերաբերում է բացառապես Օսկանյանին որպես մեղադրյալ ներգրավելու խնդրին, խափանման միջոցի հարց չի բարձրացվել:

Այս տարվա մայիսի 25-ին ՀՀ քրեական օրենսգրքի 190-րդ հոդվածի 3-րդ կետի՝ հանցավոր ճանապարհով ստացված եկամուտներն օրինականացնելու հատկանիշներով Ազգային անվտանգության ծառայությունում հարուցված քրգործում Օսկանյանը ներգրավված էր որպես վկա: Երեկ ԲՀԿ-ն ձեռնպահ էր մնում որևէ գնահատական տալ տեղի ունեցածին: Խմբակցության քարտուղար Նաիրա Զոհրաբյանը «ՀԺ»-ի թղթակցին հայտնել է, որ իրենք սույն հարցը կքննարկեն այսօր: