«Առավոտ». Օլիգարխները ունեի՞ն պետության կողմից փոխհատուցման կարիք

«Ես այդպիսի կոշտ ձևակերպումներ չէի տա: Ամեն դեպքում, ցանկացած ոք ունի սեփականության պաշտպանության իրավունք, և, այստեղ դասակարգելը, կարծես թե, մի քիչ սխալ կլինի: Այդուհանդերձ, խախտվել է մարդու սեփականության իրավունքը և վնաս է հասցվել մարդուն` անկախ նրանից, թե ինչպիսի սոցիալական կարգավիճակում է այդ անձը»,- երեկ «Առավոտի» հետ զրույցում ասաց ՀՀ Աժ մարդու իրավունքների պաշտպանության և հանրային հարցերի մշտական հանձնաժողովի նախագահ, ԲՀԿ-ական Էլինար Վարդանյանը` արձագանքելով դիտարկմանը, թե իր կարծիքով՝ մեր օլիգարխները ունեի՞ն այդ փոխհատուցման կարիքը նման խղճուկ պետբյուջեի և «ատկատների» պարագայում:

Հիշեցնենք, որ ՀԱԿ խմբակցության անդամ, նախկին զինդատախագ Գագիկ Ջհանգիրյանը նախօրեին հայտարարեց, որ 2008 թվականի մարտի 1-2-ի իրադարձությունների արդյունքում «իբր թալանված, այրված» խանութների և մեքենաների սեփականատերերը փոխհատուցում են ստացել ՀՀ կառավարությունից: Տիկին Վարդանյանը ծանոթ չէ կառավարության այդ որոշմանը, հետևաբար ձեռնպահ մնաց հանգամանալից վերլուծությունից: Սակայն մարդու իրավունքների պաշտպանության տեսակետից նշեց՝ կա նաև քաղաքացիներին հասցված վնաս, և բուժօգնության ու նման այլ բաների համար ևս պետք է մարդիկ փոխհատուցվեին. «Այլ հարց է, թե դա ինչպիսի փաստերով պետք է ապացուցվի: Սակայն եթե պետք է լինի փոխհատուցում, ապա այն պետք է լինի բազմաշերտ՝ հաշվի առնելով բոլոր տուժողների իրավունքները»:

Թերթի զրուցակիցը ձեռնպահ մնաց «մարտի 1-ի» նոր հանձնաժողով ստեղծելու ՀԱԿ-ի նախաձեռնության վերաբերյալ տեսակետ արտահայտելուց: Ասաց. «Մենք խմբակցությունում դեռևս չենք քննարկել այդ հարցը, և ես նախնական ենթադրություններ անելու կարիք չեմ տեսնում»:

ՀՀԿ խմբակցության քարտուղար Գալուստ Սահակյանն էլ կառավարության՝ փոխհատուցման մասին որոշումից տեղյակ չէր, բայց կարծում է, որ «դա ցիվիլ երևույթ է: Երբ երկրում որևէ բան է տեղի ունենում, սովորական քաղաքացին դրանից չպետք է տուժի: Դա էլ կախված է բյուջեից»: Դիտարկմանը, որ փոխհատուցում են ստացել օլիգարխները, մինչդեռ տարբեր տեսակի վնասվածքներ ստացած և բուժհիմնարկներ դիմած քաղաքացիները չեն ստացել, Սահակյանը հակադարձեց, «եթե նրանք այդ երևույթից հետո հիվանդանոցներ են ընկել, նրանց բուժումը կատարվել է լրիվ անվճար: Մի խոսքով՝ տա Աստված, որ շատ լավ բյուջե ունենանք, և տա Աստված, որ նման երևույթներ չունենանք: Մանրամասն ոչինչ չեմ կարող ասել: Տեղեկություններ չունեմ այդ մասին»:

«Առավոտի» հարցին՝ հայտնի է, որ այդ խանութների տերերը հայտնի օլիգարխներ էին, իրենք ունեի՞ն կառավարության նման քնքշանքի կարիք խղճուկ բյուջեի պայմաններում, ՀՀԿ խմբակցության ղեկավարը պատասխանեց. «ՀՀ յուրաքանչյուր քաղաքացի իրավունքներով հավասար է: Վերջին հաշվով՝ երբ ասում ենք օլիգարխ, «խ»-ն էլ մի քիչ արձագանքված, թվում է, թե գործ ունենք հակազգային տարրերի հետ, որոնք ոչնչից օգտվելու իրավունք չունեն, պարզապես պետք է աշխատեն՝ տնտեսությունը զարգացնեն, մյուսներն էլ աշխատավարձ, թոշակ ստանան: Դա այդպես չէ: Եթե որոշակի գաղափար կա՝ դա պետք է վերաբերի բոլորին: Պետությունը ցանկացած բիզնեսի գործընկերն է, և եթե բիզնեսն է տուժել, պետությունը պետք է աջակցի, որպեսզի բիզնեսը չտուժի»:

Ինչ մնում է հարցի բարոյական կողմին՝ Սահակյանը զերծ է մնում այդ ուղղությունից. «Ցիվիլ աշխարհն ինչպե՞ս է առաջնորդվում: Մարդիկ բոլորը հավասար են: Մեկը կարողանում է բիզնեսով զբաղվել, մյուսը սովորական աշխատող է, և սա չի նշանակում, որ ով որ փող ունի՝ նա մեր պետության թշնամին է, նրա փողը կարելի է հենց էնպես քամուն տալ: Իսկ մյուսը, որ չունի՝ եղած փողերը տանք նրան: Դրա համար մեկ մշակույթ գոյություն ունի. եթե մարդը տուժել է, պետությունը պետք է տեր կանգնի»: