Սենատորն ասել է Ալիևին՝ Սաֆարովին բանտ վերադարձրե՛ք

Կալիֆորնիայի սենատոր Բարբարա Բոքսերն իր վրդովմունքն է արտահայտել Ադրբեջանի կողմից դատապարտված կացնահար Սաֆարովի ներման, նրա առաջխաղացման և գովասանքի նկատմամբ և կոչ արել, որ նա անհապաղ բանտ վերադարձվի. գրում է Asbarez.com-ը՝ հղում կատարելով Ամերիկայի Հայկական ազգային կոմիտեին։

«Պարո՛ն նախագահ,

Ես գրում եմ այսօր՝ արտահայտելու համար իմ վրդովմունքը՝ կապված հայազգի զինվորին դաժանորեն սպանելու համար ցմահ դատապարտված ադրբեջանցի զինվոր Ռամիլ Սաֆարովին ազատ արձակելու և նրան ներում շնորհելու հետ։ Այս խորապես մտահոգիչ և սադրիչ արարքը ծառայեց միայն լարվածությունը բորբոքելուն և Կովկասում երկարատև խաղաղություն ապահովելուն ուղղված ջանքերը վտանգի ենթարկելուն։

Ինչպես գիտեք, պարոն Սաֆարովը դատապարտվել էր 2004 թվականին ՆԱՏՕ-ի կազմակերպած անգլերենի դասընթացներին մասնակցող հայազգի զինվորին դաժանորեն կացնահարելու համար և կրում էր իր պատիժը Հունգարիայում։ 2012 թվականի օգոստոսի 21-ին պարոն Սաֆարովն արտահանձնվել էր Ադրբեջանին, այն բանից հետո, երբ Հունգարիան ստացել էր հավաստիացումներ, որ նա կշարունակի կրել իր պատիժը։

Ադրբեջան վերադառնալուն պես պարոն Սաֆարովի ներումը իրավունքի գերակայության բացահայտ անտեսում էր։ Այս որոշումը Սաֆարովի համար կազմակերպված ընդունելության հետ միասին, արդարության սկզբունքների և մարդու իրավունքների անարգանք էր։

Ես կոչ եմ անում ձեզ վերանայել պարոն Սաֆարովին ազատ արձակելու ձեր որոշումը և հավատարիմ մնալով միջազգային իրավունքի սկզբունքներին՝ նրա կատարած սարսափելի հանցագործության համար վերադարձնել բանտ, որն էլ իր տեղն է։

Անկեղծորեն՝

Բարբարա Բոքսեր՝ ԱՄՆ սենատոր»։