Անասնակերի դեֆիցիտ․ ֆերմերները ստիպված են վաճառել անասունները

Ֆերմերներն ահազանգում են՝ հայտնվել են ծայրահեղ ծանր վիճակում. ստիպված են վաճառել անասունները կամ մորթել, քանի որ անասնակերը ոչ միայն թանկացել է, այլև չկա: Թեև տարվա կեսին ՀՀ էկոնոմիկայի նախարար Վահան Քերոբյանը հայտարարել էր, որ կառավարությունը մտադիր է էժան գնով համակցված կերեր տրամադրել ֆերմերներին, սակայն ամիսներ առաջ ոլորտում առաջացած դեֆիցիտի և գնաճի խնդիրն այդպես էլ լուծում չի ստանում։ 

ԼՈՒՐԵՐ․com-ը Էկոնոմիկայի նախարարությունից հետաքրքրվեց, թե ի՞նչ քայլերի են դիմում անասնակերի խնդիրը լուծելու համար, քանի որ երաշտի հետևանքով անասնակերի խնդիր կա․ «Որպես այլընտրանքային տարբերակ ֆերմերները կարող են դիտարկել հիդրոպոնիկ կերերի աճեցման տարբերակը, որի համար ագրոլիզինգով կարող են ձեռք բերել համապատասխան սարքավորումներ: Նաև հիմա քննարկվում է համակցված կերերի ձեռքբերման պետական աջակցության ծրագիրը», - մեր հարցին ի պատասխան ասաց Էկոնոմիկայի նախարարի մամուլի խոսնակ Գայանե Անտոնյանը։

Նկատենք, որ պետական աջակցության ծրագրի մասին Քերոբյանն ասել էր դեռևս ամռանը՝ նշելով, որ նախապատրաստում են ծրագիր, որը կլուծի անասնակերի խնդիրը։ Նա նաև խոստացել էր, որ մինչև օգոստոս ամսվա վերջ «գործիքը պատրաստ կլինի», սակայն ինչպես ասում են՝ «սայլը տեղից չի շարժվում»։ Ավելին ֆերմերները լուրջ խնդիրների առաջ են կանգնել անգամ անասնակերի ներկրման հարցում։ Նրանց մի մասը փորձել է Վրաստանից խոտ ներկրել, սակայն պարզվել է, որ մեկ հակ խոտ բերելու համար գանձվելու է 900 դրամ, այս պատճառով չեղարկվել է գործընթացը, իսկ եղածն էլ արժե 2000 դրամ: