ՌԴ ԱԳՆ-ն անդրադարձել է Ալիևի` Հայաստանի հասցեին հնչեցրած սպառնալից հայտարարություններին

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ անհրաժեշտ է ձեռնպահ մնալ հայտարարություններից ու գործողություններից, որոնք կարող են դանդաղեցնել Լեռնային Ղարաբաղի վերաբերյալ եռակողմ պայմանավորվածությունների իրականացումը։ Այսպես է նա լրագրողների խնդրանքով մեկնաբանել Ադրբեջանի նախագահ Իլհամ Ալիևի վերջին հայտարարությունը, որով նա Հայաստանին կոչ էր արել «նշել Զանգեզուրի միջանցքի բացման ժամկետները»։

«Պետք է ձեռնպահ մնալ հայտարարություններից և գործողություններից, որոնք կարող են դանդաղեցնել ամենաբարձր մակարդակով եռակողմ պայմանավորվածությունների իրականացումը և կարող են հանգեցնել հակամարտության էսկալացիայի և իրավիճակի սրման», - ասել է նա։

Մեկնաբանելով ադրբեջանցի զինվորականների կողմից Մարտունու շրջանի Ճարտար քաղաքի խաղաղ բնակչի սպանությունը՝ Զախարովան նշել է, որ Ռուսաստանը՝ որպես միջնորդ և խաղաղապահ ջանքերի համալիր ձեռնարկող երկիր, ամեն ինչ անում է իրավիճակը կայունացնելու համար։ Նրա կարծիքով` հնարավոր չէ երաշխավորել միջադեպերի իսպառ բացակայությունը, քանի որ խոսքը երկարատև հակամարտության մասին է։ Բայց այսպես թե այնպես, ամեն ինչ պետք է անել, որպեսզի իրավիճակը տարածաշրջանում չսրվի։