JPMorgan-ի վերլուծաբանները նշել են՝ երբ ամբողջապես կավարտվի կորոնավիրուսային համաճարակը

JPMorgan Chase Global Research-ի վերլուծաբանները կանխատեսել են կորոնավիրուսային համաճարակի ավարտը և համաշխարհային տնտեսության ամբողջական վերականգնում 2022 թվականին։ Այս մասին հայտնում է Axios-ը։

Փորձագետների կարծիքով՝ նոր պատվաստանյութերի և թերապևտիկ միջոցների ստեղծումը կհանգեցնի «գլոբալ շարժունակության ցիկլային վերականգնման և վերադարձի, ինչպես նաև սպառողների կողմից կուտակված պահանջարկի ազատմանը»։

«Այս կանխատեսումը պայմանավորված է բնակչության շրջանում իմունիտետի ձեռքբերմամբ, ինչպես նաև մարդկային հնարամտությամբ»,-ասում է JP Morgan Bank-ի առաջատար վերլուծաբան Մարկո Կոլանովիչը:
Միևնույն ժամանակ, փորձագետը նախազգուշացրել է նոր տարում ներդրողների համար հնարավոր ռիսկերի մասին, որոնք ներառում են Եվրոպայում և Ասիայում աշխարհաքաղաքական լարվածության աճ, էներգետիկ ճգնաժամ, գնաճի մակարդակի անորոշություն և դրամավարկային քաղաքականության նորմալացում։
Ավելի վաղ Microsoft-ի հիմնադիր Բիլ Գեյթսը կանխատեսել էր COVID-19 համաճարակի սուր փուլի ավարտը 2022 թվականին։