Ռուսաստանը ողջունում է Թուրքիայի և Հայաստանի տրամադրվածությունը՝ հարաբերությունները կարգավորելու հարցում. ՌԴ ԱԳՆ

Ռուսաստանի Դաշնությունը ողջունում է Բաքվի և Երևանի միջև ուղիղ բանակցությունները, որ տեղի են ունեցել Բրյուսելում: Այս մասին լրագրողների հետ ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

«Մոսկվան սատարում է Բրյուսելի ջանքերին՝ ուղղված Հայաստանի ու Ադրբեջանի միջև հարաբերությունների կարգավորմանը»,- ասել է նա:

Զախարովան հայտարարել է, որ Փաշինյան-Ալիև-Միշել եռակողմ հանդիպումը, որ կայացել է Բրյուսելում՝ «Արևելյան գործընկերության» վեցերորդ գագաթնաժողովի շրջանակներում, նպաստում է ՀՀ, ՌԴ և Ադրբեջանի միջև ԼՂ հարցում ձեռք բերված եռակողմ պայմանավորվածությունների հետագա իրագործմանը:

«Մենք ողջունում ենք ՀՀ և Ադրբեջանի միջև ուղիղ շփումների շարունակությունը և, իհարկե, այն, որ այդ շփումներն անցկացվում են բարձր մակարդակով»,- ասել է Զախարովան:

Նա նաև հայտնել է, որ Ռուսաստանի Դաշնությունը ողջունում է Հայաստանի և Թուրքիայի տրամադրվածությունը՝ հարաբերությունները կարգավորելու հարցում: 

«Մենք ելնում ենք նրանից, որ հայ-թուրքական հարաբերությունների կարգավորումը կնպաստի տարածաշրջանում ընդհանուր իրավիճակի բարելավմանը, կնպաստի բարիդրացիականության և վստահության մթնոլորտի ձևավորմանը և´ տարածաշրջանում, և´ ժողովուրդների միջև: Այս տեսանկյունից ողջունում ենք Անկարայի և Երևանի կողմից վերջին շրջանում ցուցաբերվող երկկողմ երկխոսությունը սկսելու տրամադրվածությունը՝ հարաբերությունների կարգավորման խնդիրները քննարկելու համար»,- նշեց Զախարովան:

Ինչ վերաբերվում է երկու երկրների կողմից ներկայացուցիչների նշանակմանը, Զախարովան ասաց, որ դա տրամաբանական և ողջամիտ քայլ է:

«Մենք մեր կողմից պատրաստ ենք ամեն կերպ աջակցել այդ գործընթացին»,- եզրափակեց Զախարովան: