ՀՀ սփյուռքի նախարարության պատվիրակությունն այցելեց Հյուսիսային Օսեթիայի Հանրապետություն

Սեպտեմբերի 23-27–ը, Հայաստանի պատվիրակության կազմում ՀՀ սփյուռքի նախարարության աշխատակազմի ղեկավար Ֆիրդուս Զաքարյանը և ԱՊՀ հայ համայնքների վարչության կովկասյան բաժնի պետ Տարոն Շագոյանը եղան Հյուսիսային Օսեթիայի հանրապետությունում, մասնակցեցին Ալանիայի Հանրապետության նախագահ Թեյմուրազ Մամսուրովին՝ կառավարման և քաղաքականության «Սանանոր» գիտահետազոտական ինստիտուտի հուշամեդալով պարգևատրման արարողությանը:

Ինստիտուտի ուսումնասիրության արդյունքներով՝ ՌԴ տարածաշրջան հանդիսացող Հյուսիսային Օսիայում ազգամիջյան հարաբերությունները գտնվում են առողջ հիմքերի վրա և հայերի նկատմամբ ազգային խտրականության դրսևորումներ չկան, ինչի համար սեպտեմբերի 25-ին Հյուսիսային Օսեթիայի Հանրապետության նախագահի պալատում հանդիսավոր պայմաններում Թեյմուրազ Մամսուրովին հանձնվեց «Ոսկի Մեդալ»:

Ինստիտուտի ղեկավար Արտուշ Զուրաբյանի հանդիսավոր խոսքից ու մեդալի հանձնումից հետո, ՀՀ սփյուռքի նախարարության և անձամբ նախարար Հրանուշ Հակոբյանի անունից՝ հայ համայնքի նկատմամբ դրսևորած հոգատարության համար Հյուսիսային Օսեթիայի Հանրապետության նախագահ Թեյմուրազ Մամսուրովին շնորհակալական խոսք ուղղեց ՀՀ ՍՆ աշխատակազմի ղեկավար Ֆիրդուս Զաքարյանը և նվիրեց ՀՀ սփյուռքի նախարարության կողմից հրատարակված գրքեր:

Ալանիայի նախագահը ջերմությամբ արտահայտվեց հանրապետությունում ապրող հայերի մասին, անդրադարձավ հայ-ալանական հարաբերությունների վաղեմությանը, որոնք գալիս են դարերի խորքից և Արտաշեսի ու Սաթենիկի օրինակով հիշեց երկու արքայատոհմերի և ժողովուրդների միջև ավանդական բարեկամական կապերը:

Պատվիրակության անդամները, այդ թվում ՀՀ ժողովրդական արտիստ Գուժ Մանուկյանը, եղան Վլադիկավկազի հայկական եկեղեցում, հանդիպեցին տեղի հայ համայնքի ներկայացուցիչների հետ, ծանոթացան համայնքում հայապահպանությանն ուղղված ծրագրերին: Ներկաները գոհունակությամբ ընդունեցին նաև «Սանանոր» գիտահետազոտական ինստիտուտի կողմից Հյուսիսային Օսեթիայի առևտրաարդյունաբերական պալատի նախագահ Վարդան Մարկոսյանցին և Մոզդոկի նախկին քաղաքապետ Գեորգի Ադամովին ինստիտուտի պրոֆեսորի կոչում շնորհելու փաստը:

Վերադարձին Հայաստանի պատվիրակությունն այցելեց Թբիլիսի, որտեղ Սուրբ Էջմիածին եկեղեցուն կից «Հայարտուն» կրթամշակութային կենտրոնում հանդիպում կայացավ Վիրահայոց թեմի առաջնորդ Վազգեն Եպիսկոպոս Միրզախանյանի և տեղի հայ համայնքի ներկայացուցիչների հետ: