«Իմացի, ում խաթր եմ քեզ ձայն տալիս». Թալինում ընդդիմության թեկնածուն կողմ քվեարկեց ՔՊ-ի թեկնածուին

Թալինի ավագանու նիստում «Քաղաքացիական պայմանագիր» կուսակցությունն առանց խմբակցություն ձևավորելու առաջադրեց համայնքապետի թեկնածու, ինչն անօրինական է։ Այս մասին այսօր՝ դեկտեմբերի 17-ին, լրագրողների հետ զրույցում ասաց «Զարթոնք» կուսակցության անդամ Մնացական Մնացականյանը։

«Օրենքում նշվում է, որ համայնքապետի թեկնածու իրավունք ունեն առաջադրել ֆրակցիաները»,-շեշտեց Մնացական Մնացականյանը՝ հավելելով, որ ՔՊ-ն փաստաթղթերը չէր ներկայացրել, ֆրակցիա չէր կազմել, և չնայած դրան առաջադրեց համայնքապետի թեկնածու, որին ավագանու 11 անդամ կողմ քվեարկեց։

Հիշեցնենք, որ Թալինում համայնքապետ ընտրվեց Տավրոս Ափեյանը։ Ընդ որում` որոշիչ մեկ ձայնը նրան տվեց հենց ընդդիմության համայնքապետի նախկին թեկնածու, «Հայք» կուսակցության անդամ Կարեն Գրիգորյանը։

«Կարեն Գրիգորյանը, դիմելով ՔՊ-ի թեկնածուին, ասաց՝ դու իմացի, ում խաթր եմ քեզ տալիս։ Եթե որևէ մեկի խաթր, ինչ-որ մեկը կարող է 6000 մարդու ձայն ոտնատակ տա, չգիտեմ...»,-ասաց Մնացական Մնացականյանը։