«Հայոց ցեղասպանության» դասավանդումը Ֆրանսիայում Օլանդի նախընտրական տագնապների արդյունքն է. Թուրքիա

Հետաքրքիր նյութ է հրապարակել թուրքական Milli Gazete թերթը` կրկին անդրադառնալով թուրքերի համար այդքան ցավոտ թեմային' Հայոց ցեղասպանությանը: Ստորև ներկայացնում ենք այն.

«Միջնակարգ դպրոցների դասարանների համար պատմության և աշխարհագրության ուսումնական գրականության մեջ, որը պատրաստվել է 2012-2013 ուսումնական տարվա համար, ֆրանսիական կրթության նախարարության կողմից ավելացվել է մի բաժին, որը նվիրված է հայերի տեղահանությանը, և որը սահմանվում է որպես «ցեղասպանություն»:

«Հայոց ցեղասպանություն» հասկացության ներմուծումը հայերի կողմից ճնշման արդյունքն է, ովքեր ապրում են Ֆրանսիայում, ինչպես նաև Ֆրանսուա Օլանդի տագնապների արդյունքն է, որ կապված է ընտրողների ձայների կորստի հետ:

Արմատական փոփոխությունների համաձայն՝ միջնակարգ դպրոցների աշակերտները նոր ուսումնական տարում համաշխարհային պատմության իրադարձությունների վերլուծության ժամանակ՝ սկսած 1910-ից, կհանդիպեն «Հայոց ցեղասպանությունը» անվանումով բաժինը»:

Թուրքական թերթն անհանգստություն է արտահայտում, որ «հաշվի չի առնվել այն հանգամանքը, որ նախարարության կողմից լուրջ փոփոխություններ մտցնելուց հետո 14-15 տարեկան երիտասարդությունը կհամարի, որ «Հայոց ցեղասպանությունը», որը անվանում են 1915թ. իրադարձությունները, հանդիսանում է ոչ թե համոզմունք, այլ պատմական փաստ, և այդպիսի գիտելիքներով նա կսկսի իր մասնագիտական կյանքը:

«Կատարելով այսպիսի մեծ քաղաքական սխալ՝ Ֆրանսիան սկսում է թուրք ժողովրդի թշնամիների մի ժառանգություն դաստիարակել:
Չնայած այս կեղծավոր քաղաքականությունն անհասկանալի է, բայց ոչ մի զարմանալու բան չկա: Մեր առջև դասական Եվրոպայի պատկերն է…»,- եզրափակում է թերթը։