Եթե տեսնենք, որ «3+2» ձևաչափը Հայաստանի շահերին չի համապատասխանում, պրոցեսները մեր շահերին հակադրվում են, չենք մասնակցի․ Փաշինյան
Արտաքին Քաղաքական
« 3+2» խորհրդատվական տարածաշրջանային պլատֆորմի առաջին նիստը փոխարտգործնախարարների մասնակցությամբ ընդհանուր առմամբ դրական տպավորություն է թողել: Այս մասին դեկտեմբերի 24-ին հրավիրված առցանց ասուլիսում հայտնել է ՀՀ վարչապետ Նիկոլ Փաշինյանը՝ պատասխանելով Մոսկվայում դեկտեմբերի 10-ի տեղի ունեցած «3+2» ձևաչափի հանդիպման արդյունքների մասին հարցին:
«Դա եղել է առաջին հիմնադիր հանդիպումը, և շատ ընդհանուր սկզբունքներ են քննարկվել` տեխնիկական, կազմակերպչական, ինչ պարբերականությամբ հանդիպում է լինելու, այդ հանդիպումները ինչպես կազմակերպել, հարցերի ինչ շրջանակ պետք է քննարկվի: Եվ այն, ինչ նախկինում հայտարարել ենք, այդ շրջանակում է եղել: Անկեղծ ասած, մեր ներկայացուցիչը ինչ մեզ զեկուցել է, ընդհանուր առմամբ դրական տպավորություններ ունենք առաջին հանդիպումից, որը չի նշանակում, որ այն ահազանգերը և ռիսկերը, որոնց մասին բարձրաձայնում են, չկան»,- ասաց Փաշինյանը:
Երկրի ղեկավարը նշեց, որ ընդհանուր առմամբ «3+2» ձևաչափը համապատասխանում է կառավարության ծրագրում ձևակերպած այն դիրքորոշումներին, որ Հայաստանն ուզում է տարածաշրջանային խոսակցություններին մասնակից լինել:
«Եթե մենք հիմա բանակցում ենք Ադրբեջանի հետ, եթե բանակցելու ենք Թուրքիայի հետ, եթե Իրանի հետ մեր երկխոսությունը մշտական է, Ռուսաստանը մեր ռազմավարական գործընկերն է, եթե առանձին-առանձին բոլորի հետ խոսում ենք` անտրամաբանական կլինի, եթե ասենք, որ այդ միջավայրում չենք ուզում խոսել: Հայկական կողմի այն նախապայմանի մասով, որ չենք քննարկվելու այնպիսի հարցեր, որոնք այլ ձևաչափերում քննարկվում են, ըմբռնումը կա, որովհետև ոչ մեկ չի ուզում այդ քննարկումը ձախողվի: Անտրամաբանական կլինի, եթե մենք հավաքվենք և տանենք այն ուղղությամբ, որ քննարկումը ձախողվի: Այդ ըմբռնումը կա, ինչը չի նշանակում, որ հաջորդ պահին փորձ չի արվի ձախողել:
Նա նշեց, որ եթե տեսնենք, որ այդ ձևաչափը Հայաստանի շահերին չի համապատասխանում և պրոցեսները գնում են այնպես, որ մեր շահերին հակադրվում են, մենք չենք մասնակցի այդ պրոցեսին։
«Բայց նախնական տպավորությունները դրական են, ինչը չի նշանակում, որ հաջորդ հանդիպումները կլինեն նույն կերպ»,- եզրափակեց Փաշինյանը:
ՈՒՂԻՂ ԵԹԵՐ
Ամենադիտված 
«Լևոն արքայի» նկատմամբ որպես խափանման միջոց է ընտրվել տնային կալանքը (տեսանյութ)
