Մտքի ուժով գրվել է աշխարհում առաջին թվիթը

Twitter-ում հայտնվել է աշխարհում առաջին գրառումը, որն արվել է միայն մտքի ուժով։ Ամերիկյան Synchron ընկերությունը ստեղծել է նեյրոինտերֆեյս, որը տեղադրվել է 62-ամյա ավստրալացի Ֆիլիպ Օ'Քիֆի ուղեղում, ով տառապում է Կողմնային ամիոտրոֆիկ սկլերոզով։ Stentrode չիպի օգնությամբ տղամարդը մտքի ուժով կարողացել է գրել իր հաղորդագրությունը Twitter-ում։ Այդ մասին հայտնում է Futurism պորտալը։

«Հուսով եմ, որ ես ճանապարհ եմ հարթում մարդկանց համար, որպեսզի նրանք թվիթ անեն մտքով»,- գրել է տղամարդը Synchron-ի գործադիր տնօրեն Թոմաս Օքսլիի էջի միջոցով:

Շատ օգտատերեր ապշած էին ընկերության հաջողությունից: Ոմանք նույնիսկ հասցրեցին պարզաբանել Ֆիլիպի հետ, թե արդյոք նա օգտագործում է ինչ-որ գրաֆիկական գործիք հրատարակման համար, թե չիպը կարող է միայն տեքստ մուտքագրել: Ավստրալացին պատասխանել է, որ ընկերության մասնագետները հատուկ մենյու են ստեղծել, որը նա կառավարում է չիպի միջոցով։