ԱՄՆ-ը «Մուջահիդին խալք»-ը հանել է ահաբեկիչների ցուցակից

ԱՄՆ պետքարտուղար Հիլարի Քլինթոնն իրանական «Մուջահիդին խալք» խմբավորումը հանել է ահաբեկչական կազմակերպությունների ցուցակից. սեպտեմբերի 28-ին հայտարարվել է Պետքարտուղարության պաշտոնական կայքում տեղադրված մամլո հաղորդագրության մեջ։

Ինչպես պարզաբանվում է մամլո հաղորդագրության մեջ, «Մուջահիդին խալք»-ը հրապարակայնորեն հրաժարվել է բռնությունների կիրառման քաղաքակնությունից, իսկ վերջին տասը տարիներին ահաբեկչական գործողություններին նրա մասնակցությունը չի հաստատվում։ Բացի այդ՝ խմբավորումը կամավոր կերպով լուծարել է Իրաքի տարածքում Աշրաֆ մարզական ճամբարը։

Այնուհանդերձ, ԱՄՆ-ը չի պատրաստվում աչք փակել «Մուջահիդին խալք»-ի ունեցած ահաբեկչական անցյալի վրա, ինչպես օրինակ՝ 1970- ական թթ. Իրանում ամերիկացիների սպանության մեջ խմբավորման ցուցաբերած մասնակցությունը։

Ֆրանսիայում բնակվող «Մուջահիդին խալք»-ի ղեկավար Մարիամ Ռաջավին ողջունել է Քլինթոնի որոշումը։ «Ես հասկանում եմ, որ այդ որոշումը հեշտ չի տրվել և քաղաքական մեծ համարձակություն է պահանջում։ Այս որոշումը, թեպետև ուշացած, բայց և ճիշտ որոշում է։ Դա շատ լուրջ քայլ է՝ վերացնելու համար այն խոչընդոտները, որոնք կանգնած են Իրանի՝ դեպի ժողովրդավարություն տանող ճանապարհին». խմբավորման ղեկավարին մեջբերում է Reutersը։

Իսկ Իրանն իր հերթին քննադատել է Պետդեպարտամենտի որոշումը։ «Այդ քայլին գնալով՝ ԱՄՆ-ը առաջին հերթին պատասխանատվություն է վերցնում իր վրա այն անմեղ իրանցիների և իրաքցիների արյան համար, որոնք զոհ են գնացել այդ խմբավորման գործողություններին»,- հայտարարել է Իրանի ԱԳ նախարարի ներկայացուցիչը։

Ինչպես հիշատակում է reuters-ը, խմբավորումը պայքարում է Իրանի հոգևոր առաջնորդների վարչակարգը տապալելու համար։ 1970-ականներին այս խմբավորումը պայքար էր մղում իրանական շահի դեմ, որին աջակցում էր ԱՄՆ-ը, իսկ 1980-ական թթ. Բաղդադի կողմից մասնակցել է իրան-իրաքյան պատերազմին։