Սիրիական բանակը Հալեպում դիմադրում է ապստամբների թեժ գրոհներին

Սիրիական զորքերը դիմադրում են երկրի՝ մեծությամբ երկրորդ քաղաք համարվող Հալեպում ապստամբների հակահարձակումներին։
Դաժան հրաձգությունները սկիզբ են առել այսօր առավոտվանից Սիրիայի հյուսիսային մայրաքաղաքի կենտրոնական շրջաններում՝ Օմայան մզկիթի և Սաադալլա ալ-Ջաբիրի հրապարակի մոտակայքում։ Գրոհայինները փորձում են ամրանալ անտիոքյան դարպասների մոտ՝ հին քաղաքի արևմտյան հատվածում, ինչպես նաև՝ հարավ-արևելյան Բաբ-Քիննեսրին դարպասների շրջանում։ Նրանք նռնականետերով կրակ են բաց թողել Սուլեյմանիա և Սայիդ Ալի թաղամասերի վրա։

Ապստամբների կողմից կառավարական ուժերի պաշտպանության գիծը ճեղքելու փորձ է արվել այսօր առավոտյան Հալեպում, որին հակահարված են տվել կառավարական զորքերը։ Ականատեսները վկայում են, որ մարտերը շարունակվել են մոտավորապես մեկ ժամ։ Սանա տեղեկատվական գործակալությունը հերքել է տարածված լուրերն այն մասին, թե իբր ապստամբները իրենց ձեռքն են վերցրել քրդական Շեյխ Մասուդ թաղամասը։ Թաղամասի բնակիչները զենքը ձեռքին պաշտպանել են իրենց տները սիրիական զինծառայողների հետ միասին։

Գործակալությունը հայտնում է նաև, որ ապստամբները կորցրել են մեծ քանակով զինվորական ուժ և ռազմական տեխնիկա։

Հիշեցնենք, որ Թաուհիդ ծայրահեղական զինված խմբավորումը հինգշաբթի օրը հայտարարել էր Հալեպում «վերջին և վճռական ճակատամարտի» մասին։ Հարձակումները սակայն դեռ ոչ մի լուրջ արդյունք չեն տվել ապստամբական շրջաններում։ Հալեպի հարավ-արևելքում՝ Սալահ ադ Դինում, գրոհայինները գրավել են զորանոցը, սակայն չեն կարողացել իրենց ձեռքում պահել և շուտով նահանջել են. տեղեկացնում է ИТАР-ТАСС-ը։

Այժմ թեժ մարտեր են ընթանում հյուսիսային Իզաա և արևելյան Սուքարի թաղամասերում, ուր կենտրոնացած են սիրիական ազատ բանակի հիմնական ուժերը։