Հուսով ենք, որ այս ժեստը պատշաճ կերպով կգնահատվի Երևանում. Թուրքիայի պաշտպանության նախարար

Թուրքիան ոչ մի հարեւան երկրի տարածքային պահանջներ չի ներկայացրել և չի ներկայացնում։ Այս մասին Անկարայում լրագրողներին տված հարցազրույցում ասել է Թուրքիայի ազգային պաշտպանության նախարար Հուլուսի Աքարը։

«Անկարան հարգում է բոլոր պետությունների, այդ թվում՝ Սիրիայի և Իրաքի սահմաններն ու ինքնիշխանությունը», - ասել է թուրք նախարարը։

Անդրադառնալով Հարավային Կովկասում տիրող իրավիճակին՝ Հուլուսի Աքարը հայտարարել է, որ Թուրքիան շարունակելու է աջակցել «եղբայրական Ադրբեջանի դիրքորոշմանը»։

«Մեր նպատակը Հարավային Կովկասում երկարաժամկետ խաղաղությունն ու կայունությունն է։ Թուրքիայի և Ադրբեջանի նախագահները խաղաղության ձեռք են մեկնել Հայաստանին: Հուսով ենք, որ այս ժեստը պատշաճ կերպով կգնահատվի Երևանում։ Սա հարց է, որը վերաբերում է ոչ միայն Ադրբեջանին կամ Հայաստանին, այլ ողջ տարածաշրջանին։ Հարավային Կովկասը պետք է վերածվի կայունության կղզու»,- ասել է  Թուրքիայի պաշտպանության նախարարը։

Նա հիշեցրել է, որ հունվարի 30-ից Ադրբեջանում գործում է թուրք-ռուսական համատեղ մոնիտորինգի կենտրոնը։ «Մենք հարցին դրական կերպով ենք մոտենում։ Հրադադարի խախտման դեպքերը նվազում են: Կայունության էլ ավելի մեծ մակարդակի հույս ունենք: Թուրքիայի և Ռուսաստանի համատեղ քայլերը նպաստում են խաղաղությանը և երկարաժամկետ հրադադարին»,- ասել է նախարարը։