Der Spiegel. Էրդողանը կառուցում է իր հուշարձանը

Թուրքիայի վարչապետ Ռեջեփ Թայիպ Էրդողանն այս կիրակի իր կուսակցության կողմից վերջին անգամ ղեկավար կընտրվի։ Սակայն նա ոչ մի դեպքում չի մտածում քաղաքական կարիերան ավարտելու մասին։ 2014թ. պլանավորած իր կուսակցությանը տրվող հրաժեշտը նրա համար պատմության դասագրքերում հավերժանալու ճանապարհ է բացում։

Ռեջեփ Թայիպ էրդողանի համար այս կիրակին շատ կարևոր օր է. գրում է թերթը։ Թուրքիայի վարչապետ և իշխող կուսակցության ղեկավար Էրդողանն Անկարայում կուսակցության համագումարին ասել է, որ վերջին անգամ կուսակցության ղեկավար է ընտրվելու և այսպիսով սկզբնավորելու է դեպի հանրապետության նախագահ իր վերելքը։ Չնայած որ Էրդողանը նախկինում այդ մասին երբեք չի խոսել, սակայն ամեն ինչ մատնանշում է այն մասին, որ 2014թ. նա որպես վարչապետ իր պաշտոնավարման ավարտից հետո ցանկանում է երկրի նախագահի պաշտոնը ստանձնել։

Էրդողանի վերընտրությունը կուսակցության ղեկավարի պաշտոնում հասարակ ձևականություն է, քանի որ որևէ լուրջ հակառակորդ թեկնածու, ով կվիճարկի նրա հետ ձայների մեծամասնությունը, պարզապես չկա։ Կուսակցությունը նաև ցանկանում է երիտասարդացնել իր կազմը։ Շատ տարիքավոր կուսակցականներ հաջորդ խորհրդարանական ընտրություններին այլևս չեն մասնակցելու։

Իսկ ինչ վերաբերում է վարչապետի պաշտոնին, ապա Էրդողանը երկար չի զբաղեցնի այն. գրում է թերթը։ Եթե նա ցանկանում է 2014թ. նախագահական ընտրություններին իր թեկնածությունը դնել, ստիպված է լինելու հրաժարվել իր բոլոր կուսակցական պաշտոններից, ինչպես նաև մինչ այդ միավորվել գործող նախագահ Աբդուլլահ Գյուլի հետ։ Երկու քաղաքական գործիչների միջև թեկնածուական պայքարը համարվում է անհնար։ Արդյոք Գյուլը գործող վարչապետին առանց պայքարի կհանձնի իր տեղը, պարզ չէ։

Նախնական հարցումների արդյունքում Գյուլն ընտրողների կողմից առավելություն է ստացել Էրդողանի նկատմամբ։