Եվրոպացիների կեսից ավելին առաջիկա շաբաթների ընթացքում կվարակվի Օմիկրոն շտամով․ ԱՀԿ

Առաջիկա 6-8 շաբաթվա ընթացքում Եվրոպայի բնակչության ավելի քան 50%-ը վարակվելու է կորոնավիրուսի Օմիկրոն շտամով, ասել է ԱՀԿ Եվրոպայի ղեկավար Հանս Կլյուգեն։

«Առողջապահության չափումների և գնահատման ինստիտուտը կանխատեսում է, որ եվրոպական տարածաշրջանի բնակչության ավելի քան 50%-ը մոտակա 6-8 շաբաթվա ընթացքում վարակվելու է Օմիկրոնով», - երեքշաբթի օրը կայացած մամուլի ասուլիսում ասել է Կլյուգեն։

Նրա խոսքով՝ վերջին շաբաթների ընթացքում հավաքագրված տվյալները հաստատում են, որ Օմիկրոնը շատ փոխանցելի է, քանի որ նրա ունեցած մուտացիաները թույլ են տալիս նրան ավելի հեշտությամբ կցվել մարդու բջիջներին, և այն կարող է վարակել նույնիսկ հիվանդներին կամ պատվաստվածներին։

Միևնույն ժամանակ, Կլյուգեն ընդգծել է, որ ներկայումս հաստատված կորոնավիրուսային պատվաստանյութերը շարունակում են լավ պաշտպանություն ապահովել ծանր հիվանդություններից կամ մահից:

ԱՀԿ Եվրոպական գրասենյակի ղեկավարը նաև ասել է, որ 2022 թվականի առաջին շաբաթվա ընթացքում տարածաշրջանում գրանցվել է COVID-19 վարակի ավելի քան 7 միլիոն նոր դեպք, ինչն իրենից ներկայացնում է երկու շաբաթվա ընթացքում դեպքերի կրկնակի աճ։