Կրթությունից աշխատաշուկա. դասընթացներ դեռահասների համար

Սեպտեմբերի 28-ին Քանաքեռ-Զեյթուն համայնքի մշակույթի տանն անցկացվեց կարիերայի օր՝ «Մասնագիտական կողմնորոշում, կրթություն, կամավորություն» խորագրով միջոցառումը, որը նախաձեռնել էր «Երիտասարդների մասնագիտական կողմնորոշման կենտրոն» ՊՈԱԿ-ը՝ «Վորլդ-Վիժն»-Հայաստան գրասենյակի հետ համատեղ:

Միջոցառման նպատակն էր աջակցել Երևանի՝ մասնավորապես Քանաքեռ-Զեյթուն վարչական շրջանի 14-16 տարեկան դեռահասների մասնագիտական կողմնորոշմանն ու կարիերայի ընտրությանը, կրթություն և ուսուցում ստանալու հնարավորությունների բացահայտմանը:

Միջոցառմանն իրենց առանձին տաղավարներով և ակտիվ նախաձեռնություններով հանդես եկան Երևանի թվով 11 մասնագիտական ուսումնական հաստատություն: Նրանք ներկայացրեցին իրենց հաստատությունում մասնագիտական կրթություն և ուսուցում ստանալու հնարավորությունները, մասնագիտություններն ու որակավորումները, ընդունելության պայմանները: Որոշ հաստատություններ աշխատաշուկայում առավել պահանջարկված մասնագիտությունների գծով կազմակերպեցին վարպետաց դասեր: Զուգահեռաբար, Երիտասարդների մասնագիտական կողմնորոշման կենտրոնի մասնագետներն արդեն ավագ դպրոցի աշակերտների համար անցկացրեցին «Կրթությունից աշխատաշուկա» թեմայով ոչ ֆորմալ ուսուցման դասընթացներ, ցուցադրվեց տասը մասնագիտություններ ներկայացնող ֆիլմաշարը: Չորս ժամ տևած միջոցառմանը մասնակցեցին ավելի քան 200 դեռահաս հինգ դպրոցներից:

Արդյունքում ակնկալվում է, որ դեռահասները կկարևորեն մասնագիտության գիտակցված ընտրությունը, ինչը պայմանավորված կլինի ինչպես շուկայի պահանջարկով, այնպես էլ նախընտրած մասնագիտության նկատմամբ անձնային վերաբերմունքով, կբարձրանա ծնողների տեղեկացվածությունը և ներգրավվածությունը: Մյուս կողմից, սա հնարավորություն է ցույց տալու աշխատաշուկայի պահանջարկի և միջին մասնագիտական ու նախնական/արհեստագործական հաստատությունների միջև փոխկապակցվածության ճկունությունն՝ ի տարբերություն բուհական կրթության: