Գորտերի նոր տեսակն անվանվել է Գրետա Թունբերգի անունով

Գորտերի նոր տեսակն անվանվել է էկոակտիվիստ Գրետա Թունբերգի պատվին։ Այս մասին հոդված է հրապարակվել ZooKeys ամսագրում։

Pristimantis gretathunbergae անունով գորտերը ապրում են Պանամայում։ Այս տեսակը հայտնաբերվել է Կոնրադ Մեբերտի գլխավորությամբ  հետազոտական ​​խմբի կողմից:

Գորտը հայտնաբերվել է Չուկանտի լեռան վրա՝ շրջապատված արեւադարձային անտառներով։ Մառախլապատ անտառում դրա բնակվելու վայր հասնելու համար գիտնականները ստիպված են եղել ձի նստել և ճամբարել ծովի մակարդակից մոտ 1000 մետր բարձրության վրա:

Գրետա Թունբերգի անունով գորտն ունի սև աչքեր, որոնք բնորոշ են Կենտրոնական Ամերիկայի գորտերին: Նրա ամենամոտ ազգականներն ապրում են Կոլումբիայի հյուսիս-արևմուտքում։ 

Անունը շնորհվել է ԱՄՆ-ում գործող Rainforest Trust-ի կողմից կազմակերպված աճուրդից հետո: Ամեն տարի գիտնականները հայտնաբերում են մոտ հարյուր նոր տեսակ, և այս աճուրդում յուրաքանչյուրը կարող է իրավունք ձեռք բերել դրանցից մեկի անունը տալու։ Հավաքված գումարն ուղղվելու է անհետացող տեսակների պահպանմանը։