ՀՀ պետական բուհերի ռեկտորները հանդիպել են նախարարին

Տեղի է ունեցել ՀՀ պետական բուհերի ռեկտորների խորհրդի հերթական նիստը, որին մասնակցել է նաև ՀՀ կրթության և գիտության նախարար Արմեն Աշոտյանը: Նիստի օրակարգում ընդգրկված էին հետևյալ հարցերը՝ մասնագիտությունների ցանկ, աշխատանքային խմբի ստեղծում՝ կրթական երրորդ աստիճանի հետ կապված խնդիրների ուսումնասիրության նպատակով, բուհերում գնումների գործընթացի կազմակերպման հետ կապված և մի շարք այլ հարցեր:

Անդրադառնալով օրակարգի առաջին հարցին՝ Արմեն Աշոտյանը բուհերի ռեկտորներին հանձնարարել է մասնագիտությունների խոշորացման սկզբունքից ելնելով՝ մեկ շաբաթվա ընթացքում վերանայել և ներկայացնել համապատասխան առաջարկություններ, իսկ մինչև հոկտեմբերի 20-ը՝ ըստ մասնագիտությունների խմբերի և կրթական աստիճանների՝ նաև կրթության որակավորումների բնութագրեր: Անդրադառնալով բուհերում գնումների գործընթացի կազմակերպման հետ կապված հարցերին՝ Արմեն Աշոտյանը հանձնարարել է խստագույնս պահպանել գնումների կազմակերպման հետ կապված ՀՀ օրենսդրությամբ սահմանված ողջ ընթացակարգը՝ նշելով, որ հայտնաբերված ցանկացած բացթողում ստվեր կգցի ոչ միայն տվյալ բուհի, այլ ողջ կրթական համակարգի վրա:

Հանդիպման ընթացքում Արմեն Աշոտյանը ռեկտորներին տեղեկացրել է, որ հոկտեմբերի երկրորդ կիսամյակից նախարարի հրամանով ստեղծված աշխատանքային խմբի ուսումնասիրությունների միջոցով ՀՀ կրթության և գիտության նախարարությունը բոլոր բուհերում խստացնելու է իր վերահսկողական գործառույթը: Ըստ նախարարի՝ ուսումնասիրությունները վերաբերելու են բուհում կրթական գործընթացի կազմակերպման օրինաչափությանը, օրինականությանը և համապատասխանությանը ՀՀ օրենսդրությանը, ՀՀ կառավարության որոշումների և ԿԳ նախարարի հրամանների իրականացմանը: Այդ առնչությամբ Արմեն Աշոտյանը ներկաներին հիշեցրել է, որ նախարարությունը բուհերին տրամադրել է ուսումնասիրությունների համապատասխան թերթիկը և ժամանակացույցը, որպեսզի վերջիններս հնարավորություն ունենային ծանոթանալ նախատեսվող ուսումնասիրությունների ողջ համակազմին: Հանդիպման օրակարգի մյուս հարցը վերաբերում էր Եվրամիության կողմից առաջարկվող Արևելյան գործընկերության երկրների համար նախատեսված ծրագրի կրթական բաղադրիչին, մասնավորապես, Տեմպուս և Էրազմուս-Մունդուս ծրագրերի մասնակցության ընդլայնման, ԵՄ-ERASMUS for ALL, Եվրոպական մի շարք երկրներում շարժունության, երկկողմանի հարաբերությունների միջոցով միջբուհական համագործակցության, կրթական քաղաքականության մշակման և ներդրման համատեքստում:

Հանդիպման ընթացքում քննարկվել են նաև հակաակոռուպցիոն ծրագրերի բուհական հաշվետվություններին և երիտասարդական խորհրդարանին վերաբերող այլ խնդիրներ: