Բժշկական դիմակներն ավելի գրավիչ են դարձնում մարդկանց. հետազոտություն

Քարդիֆի համալսարանի բրիտանացի գիտնականները պարզել են, որ միանգամյա օգտագործման բժշական դիմակով ծածկված դեմքն ավելի գրավիչ է ընկալվում։ Այս մասին հայտնում է The Guardian թերթը։

Նախքան համաճարակն իրականցված հետազոտությունները ցույց են տվել, որ բժշկական դիմակները նվազեցնում են գրավչությունը, քանի որ դրանք կապված են հիվանդության հետ: Սակայն ժամանակի ընթացքում իրավիճակը փոխվել է, և նոր հարցումը ցույց է տվել բոլորովին այլ միտում։
 
«Մեր հետազոտությունը ցույց է տալիս, որ դեմքերը համարվում են առավել գրավիչ, երբ դրանք ծածկված են բժշկական դիմակներով: Դա կարող է պայմանավորված լինել նրանով, որ մենք սովոր ենք տեսնել բուժաշխատողներին կապույտ դիմակներով... Միևնույն ժամանակ, երբ մենք խոցելի ենք զգում, կարող ենք բժշկական դիմակներ կրելը հուսադրող համարել և հետևաբար ավելի լավ վերաբերվել նրան, ով կրում է այն», - ասում է դեմքի փորձագետ դոկտոր Մայքլ Լյուիսը:

 
Հետազոտության առաջին մասն իրականացվել է 2021 թվականի փետրվարին, երբ Մեծ Բրիտանիայի բնակչությունն արդեն սովոր էր դիմակներ կրելուն։ 1-ից տասը սանդղակով 43 կանայք գնահատել են առանց դիմակի, հասարակ կտորից դիմակով, կապույտ բժշկական դիմակով և դեմքի ստորին հատվածը ծածկող սև գրքով արական դեմքերի պատկերների գրավչությունը:
 
Ինչպես պարզվել է, կտորե դիմակ կրողները զգալիորեն ավելի գրավիչ էին, քան նրանք, ովքեր դիմակ չունեին կամ ում դեմքը մասամբ թաքցված էր գրքով։
 
Բայց պարզ, մեկանգամյա օգտագործման վիրաբուժական դիմակը կրողին դարձնում էր ամենացանկալին:
 
«Արդյունքները հակասում են նախահամաճարակային ուսումնասիրություններին, ըստ որոնց` դիմակները ստիպում են մարդկանց մտածել հիվանդության մասին, և որ այդ մարդուց պետք է խուսափել», - ասել է Լյուիսը:
 
Նրա խոսքով՝ համաճարակը փոխել է դիմակ կրողների ընկալումը, և այժմ մարդիկ դրանք չեն ընկալում որպես վտանգի ազդանշան։
 
Գիտնականը կարծում է, որ դիմակներն ավելի գրավիչ են դարձնում մարդկանց, քանի որ դրանք ուշադրությունն ուղղում են դեպի աչքերը։