Վալերի Պեկրեսը պատասխանել է Ալիևի` իր հասցեին հնչեցրած սպառնալիքներին

Ֆրանսիական Իլ դը Ֆրանս կենտրոնական շրջանի ղեկավար, Ֆրանսիայի նախագահի թեկնածու Վալերի Պեկրեսը մեկնաբանել է Ադրբեջանի նախագահ Իլհամ Ալիևի՝ Արցախ այցելության պատճառով իր հասցեին հնչեցրած սպառնալիքները՝ նշելով, որ նման սպառնալիքներն իրեն չեն վախեցնում։ Նա զարմանք է հայտնել ֆրանսիական դիվանագիտության «խլեցնող լռության» կապակցությամբ։

Հիշեցնենք, որ Ալիևը վերջերս հայտարարել էր, որ եթե իմանար Վալերի Պեկրեսի` Արցախ այցելության մասին, հաստատ չէր թողնի, որ նա հետ գնա։

Նշենք, որ Վալերի Պեկրեսը Հայաստան կատարած այցելության վերաբերյալ գրառում էր կատարել «Ֆեյսբուք» սոցիալական ցանցի իր պաշտոնական էջում:

Վալերի Պեկրեսը գրառմամբ տեղեկացրել էր, որ Ֆրանսիայի Սենատի «Հանրապետականներ» խմբակցության ղեկավար Բրունո Ռետայոյի և Ֆրանսիայի նախկին ԱԳ նախարար Միշել Բարնյեի հետ միասին ինքն այցելել է Ֆրանսիայի եղբայրական երկիր՝ հանդես գալով Լեռնային Ղարաբաղում խաղաղության վերականգնման և Հայաստանի տնտեսական ու մշակութային զարգացման և հայկական հոգևոր ժառանգության պահպանման հարցերում Ֆրանսիայի աջակցությունը մեծացնելու օգտին:

Ֆրանսիացի քաղաքական գործիչը գրառմանը կից նաև լուսանկարներ էր հրապարակել ՀՀ նախագահ Արմեն Սարգսյանի, Ամենայն Հայոց Կաթողիկոս Գարեգին Երկրորդի, Արցախի Հանրապետության նախագահ Արայիկ Հարությունյանի հետ հանդիպումներից և Ծիծեռնակաբերդ կատարած այցելությունից: