ԼՂՀ նախագահը բարձր է գնահատել ՀՀ ՏՄՊՊՀ-ի կողմից մինչ այսօր ԼՂՀ-ում կատարված աշխատանքները

ՀՀ Տնտեսական մրցակցության պաշտպանության պետական Հանձնաժողովի պատվիրակությունը՝ նախագահ Ա. Շաբոյանի գլխավորությամբ աշխատանքային այցով մեկնել է ԼՂՀ, որտեղ դեկտեմբերի 12-ին հանդիպումներ է ունեցել ԼՂՀ նախագահ Բակո Սահակյանի և վարչապետ Արայիկ Հարությունյանի հետ:

Համաձայն նախորդ տարի կնքված համագործակցության հուշագրի, կողմերը համագործակցում են ՀՀ-ում և ԼՂՀ-ում մրցակցային միջավայրի բարելավմանն ուղղված քայլերի իրականացման շուրջ: Հանդիպումների առանցքային թեման առնչվել է հուշագրով նախատեսված աշխատանքների իրականացման ընթացքին, մինչ այս կատարված միջոցառումների արդյունքներին, ինչպես նաև հստակեցվել են հետագա անելիքները:

ԼՂՀ նախագահը բարձր է գնահատել ՀՀ ՏՄՊՊՀ-ի կողմից մինչ այսօր ԼՂՀ-ում կատարված աշխատանքները՝ ընդգծելով, որ դրանք արդյունավետ են և հույս է հայտնել, որ հետագայում ևս փոխադարձ համագործակցությունը կբերի խնդիրների լուծմանն ու մրցակցային դաշտի բարելավմանը: ՏՄՊՊՀ նախագահ Ա. Շաբոյանը անդրադարձել է տարվա ընթացքում կատարված աշխատանքներին, որոնք մեծապես նպաստել են ԼՂՀ Հանձնաժողովի ինստիտուցիոնալ կարողությունների բարձրացմանը: Ա. Շաբոյանը նշել է, որ ստացված արդյունքները դեռևս բավարար չեն, կան նոր ծրագրեր և նոր գաղափարներ, որոնք ՏՄՊՊՀ-ը նախատեսում է այս այցի շրջանակներում քննարկել ԼՂՀ գործընկերների հետ և դրանք միասին իրագործել հաջորդ տարվա ընթացքում:

Ապա տեղի է ունեցել Ա. Շաբոյանի հանդիպումը ԼՂՀ հանրային ծառայությունները և տնտեսական մրցակցությունը կարգավորող հանձնաժողովի նախագահ՝ Հ. Ղահրամանյանի և հանձնաժողովի աշխատակազմի հետ: Հ. Ղահրամանյանը ընդգծել է, որ երկու Հանձնաժողովների համագործակցությունն իսկապես բավականին արդյունավետ է և իր գոհունակությունն է հայտնել ՏՄՊՊՀ-ի կողմից իրենց կառույցին ցուցաբերվող աջակցությունից: Հանդիպման ընթացքում ներկայացվել են կատարված աշխատանքները, ստացված արդյունքները, քննարկվել են հետագա համագործակցության բարելավման առաջարկներ: Ա. Շաբոյանը ԼՂՀ Հանձնաժողովի աշխատակիցներին է ներկայացրել մրցակցության օրենսդրության մեջ կատարված հիմնական փոփոխությունները, տարվա ընթացքում ՏՄՊՊՀ-ի կողմից կատարված հիմնական բացահայտումները և մրցակցության ոլորտում առկա հիմնախնդիրները: Այնուհետև Ա. Շաբոյանը պատասխանել է ԼՂՀ հանձնաժողովի աշխատակիցների հարցերին:

Նշենք, որ փորձի փոխանակման նպատակով ՀՀ ՏՄՊՊՀ փորձագետները 2011 թվականին բազմաթիվ այցեր են կատարել ԼՂՀ և տեղի մասնագետների հետ կատարել են մի շարք համատեղ աշխատանքներ՝ ուղղված ապրանքային շուկաների ուսումնասիրությանը, գերիշխող դիրքի բացահայտմանը:

ՏՄՊՊՀ աշխատակիցների աջակցությամբ ներդրվել է գների մոնիտորինգի իրականացման մեխանիզմը, բացի այդ ԼՂՀ հանձնաժողովի գործընկերների հետ միասին ստուգայցեր են կատարել Ստեփանակերտի տարածքում գտնվող առևտրի կետեր, բացահայտել են անբարեխիղճ մրցակցության մի շարք դեպքեր և դրանց արդյունքում հարուցել են վարչական վարույթներ: Բացի այդ ՀՀ ՏՄՊՊՀ մասնագետների մասնակցությամբ իրականացվել են մի շարք աշխատանքներ' ուղղված օրենսդրական ակտերի մշակմանն ու մրցակցային քաղաքականության բարելավմանն ընդհանրապես:

ԼՂՀ Հանձնաժողովի մասնագետները մշտապես տեղեկացվել են միջազգային տարբեր կառույցների կողմից մրցակցային ոլորտում տեղի ունեցող իրադարձություններին: Մրցակցային մարմինների համագործակցությունը նախատեսվում է շարունակել և ընդլայնել նաև հաջորդ տարիներին: Մասնավորապես 2012թ.-ին նախատեսվում է ԼՂՀ հանրային ծառայությունները և տնտեսական մրցակցությունը կարգավորող հանձնաժողովում ստեղծել միջազգային տեղեկատվական համակարգերին մուտք ունեցող լրջագույն տեղեկատվական բազա, հիմնել մրցակցության ոլորտի վերաբերյալ գրադարան և բարձրացնել ԼՂՀ հանձնաժողովի տեխնիկական վերազինման մակարդակը: