Reuters. Ադրբեջանը ցանկանում է օգնել Իսրայելին՝ Իրանի վրա հարձակվելու ժամանակ

Ադրբեջանը դիտարկում է Իսրայելին օգնելու հնարավորությունը՝ Իրանի միջուկային օբյեկտների վրա հարձակվելու ժամանակ, տեղեկացնում է Reuters-ը:

Լրագրող Թոմաս Գրովի պատրաստած զեկույցը հիմնված է Ադրբեջանի ռազմական քաղաքականությունից իրազեկ տեղական պաշտոնյաների հաղորդած տվյալների վրա: Դրանց համաձայն՝ ադրբեջանական իշխանությունները, Իսրայելի հետ մեկտեղ, քննարկում են, թե ինչպես կարող են ադրբեջանական օդուժի բազաները և անօդաչու թռչող սարքերն օգնել Իսրայելի ռազմաօդային ուժերին՝ Իրանի դեմ հարձակումներ ձեռնարկելու համար:

Զեկույցի համաձայն՝ Իսրայելը ստիպված կլինի հաղթահարել բազում խոչընդոտներ՝ Ադրբեջանից օգնություն ստանալու համար, քանի որ անորոշ է՝ Ադրբեջանի նախագահը կհամարձակվի՞ արդյոք վտանգի ենթարկել իր երկրի նավթային արդյունաբերությունը՝ գնալով նման քայլի: Ի հավելումն դրան՝ Ադրբեջանի հնարավոր աջակցությունը կարող է դժգոհության ալիք առաջացնել մուսուլմանական աշխարհում:

Միաժամանակ երկու ադրբեջանցի նախկին զինվորական սպաներ, որոնք կապեր ունեն ծառայող անձնակազմի հետ պատմել են Reuters-ին, որ Ադրբեջանը և Իսրայելը դիտարկել են, թե ինչպես ադրբեջանական բազաները և հետախուզությունը կարող են օգնել Իրանի վրա հնարավոր հարձակման դեպքում։