Հայաստանի խոշորագույն մարզը` Գեղարքունիքը, հարաբերություններ է զարգացնում Ռուսաստանի Օմսկի մարզի հետ

ԴԻԱԼՈԳ կազմակերպության նախաձեռնությամբ և Օմսկի մարզի նահանգապետ Ալեքսանդր Բուրկովի հրավերով Գեղարքունիքի մարզի պատվիրակությունը մարզպետ Կարեն Սարգսյանի գլխավորությամբ 2022 թ. հունվարի 20-21-ը կայցելի Ռուսաստանի Օմսկի մարզ:

Այցելության ընթացքում երկու տարածաշրջանների միջև առևտրա-տնտեսական և հումանիտար գամագործակցության զարգացման վերաբերյալ բանակցություններ տեղի կունենան Օմսկի նահանգապետ Ալեքսանդր Բուրկովի հետ: Հայկական մարզի պատվիրակությունը նաև կայցելի Օմսկի արդյունաբերական ձեռնարկություններ և ուսումնական հաստատություններ, հանդիպում կունենա տեղի հայ համայնքի հետ: Գեղարքունիքի և Օմսկի մարզերի միջև 2016 թվականին ստորագրվել է համագործակցության համաձայնագիր:

Իսկ ԴԻԱԼՈԳ կազմակերպությանը Օմսկի մարզի վարչակազմի և տեղի հայ համայնքի հետ կապում են գործընկերային հարաբերություններ: Այսպես, դեռևս 2017 թ. դեկտեմբերին Օմսկի մարզի ղեկավար Ակեքսանդր Բուրկովի հրավերով ԴԻԱԼՈԳԻ պատվիրակությունը Յուրի Նավոյանի գլխավորությամբ այցելել է Օմսկ և մարզի ղեկավարության հետ քննարկել հայ-ռուսական միջտարածաշրջանային համագործակցության շրջանակներում Հայաստանի հետ համագործակցության զարգացման հնարավորությունները: Յուրի Նավոյանի խոսքերով, հետագա տարիներին տարբեր պատճառներով հնարավոր չի եղել Օմսկի մարզի և Հայաստանի մարզերի միջև ղեկավարների մակարդակով պաշտոնական պատվիրակություններ փոխանակել:

Այդ իմաստով ներկա այցը նշանակալի իրադարձություն է հայ-ռուսական միջտարածաշրջանային համագործակցության համար` նախորդ տարվա հոկտեմբերին Հայ-ռուսական ութերորդ միջտարածաշրջանային ֆորումի անցկացումից և դեկտեմբերին Հայաստանի և Ռուսաստանի կառավարությունների միջև 2022–2027 թթ. միջտրածաշրջանային համագործակցության ծրագրի ստորագրումից հետո:

ԴԻԱԼՈԳԻ նախագահը վստահություն է հայտնում, որ հայկական կառավարական պատվիրակության այցը ռուսաստանյան տարածաշրջան թույլ կտա սահմանելու գործարար շրջանակների, ստեղծագործական խմբերի և երիտասարդական կազմակերպությունների պատվիրակությունների փոխանակման մեխանիզմները, խթան կհանդիսանա միմյանց տարածքներում փոխադարձաբար մնայուն բիզնես ֆորումների անցկացման համար: Հենց նման համակարգային միջոցառումներն էլ Գեղարքունիքի և Օմսկի միջև առևտրա-տնտեսական և հումանիտար հարաբերությունների աշխուժացման գրավականը կդառնան:

Նա ընդգծում է, որ ներկա այցի նախապատրաստման ժամանակ հատուկ ուշադրություն է դարձվել Գեղարքունիքի գյուղատնտեսների համար օմսկյան արտադրության գյուղատնտեսական տեխնիկայի և պարագաների, ինչպես նաև արդյունաբերական սարքավորումների առաքմանը: Հայկական պատվիրակությունը կայցելի Օմսկի հենց այն ձեռնարկություններ, որոնց հետ շահագրգռված է համատեղ արտադրություններ կազմակերպել: Քննարկումների օրակարգում կարևոր տեղ են գրավում նաև սննդամթերքի փոխադարձ առաքման հնարավորությունները, տուրիզմի ոլորտում համագործակցության զարգացումը` հաշվի առնելով երկու տարածաշրջանների համապատասխան հնարավորությունները, տեղեկատվական տեխնոլոգիաների ոլորտում գործընկերությունը, ռոբոտոտեխնիկական և այլ փառատոններին դպրոցականների մասնակցությունը: «Օմսկի պետական մանկավարժական համալսարանի ղեկավարության հետ կքննարկվեն կրթության ոլորտում համագործակցության զարգացման, սեզոնային դասընթացների անցկացման հարցերը, այդ թվում` հայերեն և ռուսերեն լեզուների ուսուցմամբ: Օմսկի հայերը, ինչպես և ողջ Ռուսաստանի հայ համայնքը, հանդիսանում են լրացուցիչ կապող օղակ և միջտարածաշրջանային համագործակցության բնական շահագրգռված ռեսուրս: Տեղի հայ համայնքի հետ հանդիպմանը, որը գլխավորում է Արայիկ Թաթոյանը, Հայաստանի պատվիրակությունը կքննարկի Հայաստանի և Օմսկի մարզի համագործակցության ծրագրերում տեղի հայերի ներուժի ընդգրկման լրացուցիչ հնարավորությունները», - նշում է Յուրի Նավոյանը` ամփոփելով ռուսաստանյան տարածաշրջան հայկական պատվիրակության այցի ծրագիրը:

Այս տարվա գարնանը նախատեսվում է նահանգապետ Ալեքսանդր Բուրկովի գլխավորությամբ Օմսկի մարզի պատվիրակության այցը Հայաստան, ինչը հնարավորություն կտա համագործակցությանը հաղորդել համակարգված և երկարաժամկետ բնույթ:

Տեղեկանք. Օմսկի մարզը գտնվում է Սիբիրի հարավ-արևմտյան մասում և մոտ երկու միլիոն բնակչությամբ զբաղեցնում է 141, 1 կմ² տարածք: Այստեղ ավելի քան քառասուն հազար հայեր են ապրում: Օմսկի մարզը առավելապես հայտնի է ռազմական, աէրոտիեզերական և գյուղատնտեսական մեքենաշինությամբ, նավթաքիմիական, թեթև և սննդի արդյունաբերությամբ: 2017 թ. հոկտեմբերից մարզի ղեկավարը Ալեքսանդր Բուրկովն է: