Շարունակելու ենք պայքարել արդարության համար. Ստամբուլում ոգեկոչել են Դինքի սպանության 15-րդ տարելիցը

Թուրքիա 19 Հունվար, 2022 19:32

Թուրքիայում լույս տեսնող հայկական «Ակօս» թերթի նախկին խմբագրության մոտ՝ ճիշտ այնտեղ, որտեղ 15 տարի առաջ սպանվել է պոլսահայ մտավորական, պարբերականի երջանկահիշատակ գլխավոր խմբագիր Հրանտ Դինքը, հունվարի 19-ին հիշատակի միջոցառում է կազմակերպվել:

«Արմենպրես»-ի փոխանցմամբ, ամեն տարվա նման՝ այս տարի ևս ելույթով է հանդես եկել մտավորականի կինը՝ Ռաքել Դինքը, որը նշել է. «15 տարի եղավ, ինչ թիկունքիցդ արձակած կրակոցները քեզ տարան մեզանից: Ձայնդ դեռ ականջումս է: Ամեն անգամ, երբ պատմում էիր, թե ինչ են արել քո ժողովրդի հետ, քեզ մեղադրում էին դավաճանության, թիկունքից հարվածելու համար… Միշտ ասում էիր. «Սիրեք ձեր թշնամիներին, լավություն արեք ձեզ ատողներին, լավություն արեք ձեզ անիծողներին, աղոթեք վիրավորողների համար»: Աղոթում եմ»:

Իր ելույթում Ռաքել Դինքն անդրադարձել է Թուրքիայում վերջին տարիներին մարդու իրավունքների սաստկացած ոտնահարումների, ընդդիմադիր և ոչ իշխանահաճո գործիչներին լռեցնելու փորձերի, նրանց ձերբակալելու փաստերին:

«Քեզ հողին հանձնելիս այստեղից բարձրացող ըմբոստության և մերժումի ձայնը չլռեց և չի լռելու: Բանվորները, կանայք, ուսանողները, գյուղացիները կրկին պայքարի մեջ են: Մի օր նորից կմիավորվեն ու հեղեղ կդառնան»,- նշել է մտավորականի կինը:

Արարողությանը ներկա են եղել մեջլիսի հայ պատգամավոր Կարո Փայլանը, Դինքի ընկերներն ու գաղափարակիցները, մտավորականներ ու ակտիվիստներ: «Մենք այստեղ ենք և շարունակելու ենք պայքարել արդարության համար»,- նշել են Դինքի ընկերները:

Պոլսահայ մտավորական Հրանտ Դինքը սպանվել է 2007 թվականի հունվարի 19-ին՝ իր իսկ հիմնադրած «Ակօս» պարբերականի խմբագրության առջև՝ դավադրաբար թիկունքից արձակած կրակոցներով: Կրակողը թուրք ազգայնական Օգյուն Սամասթն էր, որը հանցանքն իրականացնելիս ընդամենը 17 տարեկան էր: Դատարանը նրան դատապարտել է 22 տարվա ազատազրկման: Սպանության կազմակերպիչը՝ Յասին Հայալը, 2012 թվականի հունվարի 17-ին ցմահ բանտարկության է դատապարտվել: Հանցագործության իրական շարժառիթներն ու պատասխանատուները մինչ օրս հայտնի չեն: