Ինչ է Ռուսաստանը շահում աշխարհաքաղաքական լարվածությունից

S&P վարկանիշային գործակալության վերլուծաբանները նշել են Ռուսաստանի համար տնտեսական օգուտները շարունակվող աշխարհաքաղաքական խնդիրներից։ Նրանց զեկույցից հատվածներ է փոխանցում РБК-ն։

Ըստ հեղինակների՝ քաղաքական աճող լարվածությունից հիմնական առավելությունն է էներգակիրների գների բարձրացումը և դրա հետ կապված բյուջեի համալրումը։ Ընդ որում, շահում է ոչ միայն Ռուսաստանը, այլեւ Ուկրաինան ու Ղազախստանը՝ արտահանելով երկաթի հանքաքար, նավթ ու ուրան։

Սակայն ստեղծված իրավիճակում ակնհայտ թերություններ կան, կարծում են վերլուծաբանները։ Դրանցից գլխավորը աճող ինֆլյացիան է, որը նախորդ տարեվերջին կազմել է 8,4 տոկոս։

Բացի այդ, ռիսկերը ներառում են նաև ռուբլու թուլացումը: «Մեր հիմնական սցենարը նախկինի պես հետևյալն է. Ռուսաստանի տնտեսությունը և ֆինանսական համակարգը կշարունակեն դիմակայել ցնցումներին, որոնք կապված են սահմանափակումների չափավոր խստացման հետ», - ամփոփել են վերլուծաբանները:

Անցյալ տարվա աշնանից արևմտյան երկրները Ռուսաստանին մեղադրում են Ուկրաինա ներխուժելու մտադրության մեջ։ Մոսկվան հերքում է նման ենթադրությունները և ի պատասխան ԱՄՆ-ի, Եվրամիության ու ՆԱՏՕ-ի` «անվտանգության երաշխիքների» պահանջներ է ներկայացնում, որոնք, մյուս կողմի կարծիքով, անընդունելի կետեր են պարունակում։