The Daily Telegraph. Սիրիայի նախագահ Ասադին մեղադրում են Քադաֆիին «հանձնելու» մեջ

Սիրիայի նախագահ Բաշար Ասադը կարևոր դեր է խաղացել Լիբիայի նախկին նախագահ Մուամար Քադաֆիի ձերբակալման գործում. երկուշաբթի օրը գրել է բրիտանական The Daily Telegraph-ը՝ հղում կատարելով լիբիական հետախուզական ծառայության նախկին աշխատակից Ռամի ալ Ուբեյդիին:

Նրա խոսքերով`սիրիական կառավարությունը ֆրանսիական հատուկ ծառայություններին է փոխանցել Քադաֆիի արբանյակային հեռախոսի համարը, որով հնարավոր է եղել պարզել նրա գտնվելու վայրը: Ինչպես գրում է թերթը, դա տեղի է ունեցել այն պահին, երբ միջազգային հանրության ուշադրությունը սկսել էր Լիբիայից կենտրոնանալ Սիրիայի վրա:

«Դրա դիմաց Ֆրանսիան Ասադին խոստացել էր ժամանակ տրամադրել և թուլացնել նրա վարչակարգի վրա քաղաքական ազդեցությունը, ինչը և տեղի էր ունեցել»,-ասել է Ալ Ուբեյդին:

Նախկին հետախույզը նաև պատմել է, որ հենց Ֆրանսիան է կազմակերպել Մուամար Քադաֆիի ձերբակալման գործողությունը՝ «ուղղելով լիբիական ապստամբներին այն վայրը, ուր կազմակերպվել էր ծուղակը, որի արդյունքում Քադաֆիին հնարավոր էր եղել բռնել»: