«SWIFT» համակարգից ՌԴ-ին հեռացնելը ծանր ազդեցություն կունենա Հայաստանի տնտեսության վրա․ ԿԲ նախագահ

Արևմուտքի կողմից Ռուսաստանի Դաշնության նկատմամբ  պատժամիջոցներ կիրառելու դեպքում Հայաստանի տնտեսությունը այս կամ այն չափի ազդեցություն կկրի՝ կախված պատժամիջոցների բնույթից: Այս մասին, այսօր՝ փետրվարի 1-ին, մամուլի ասուլիսում հայտարարեց ԿԲ նախագահ Մարտին Գալստյանը:

«Եթե դա պայմանավորված լինի ու սահմանափակվի միայն անհատների նկատմամբ սանկցիաներով, մի պատմություն կլինի։ Եթե սանկցիաները ներառեն նաև ֆինանսական հատվածը, եթե այդպիսի խնդիրներ ի հայտ գան, բնականաբար, ՌԴ-ում տեղի կունենա, ամենայն հավանականությամբ, ազգային արժույթի արժեզրկում, որի հետևանքով մեր մրցունակությունը որոշակիորեն կկորցնենք ՌԴ տնտեսության հանդեպ։ Դա դեռ ամենաթեթև բաներն եմ ասում»,- ասաց նա։

ԿԲ նախագահի խոսքով՝ Ֆինանսական հատվածից եկող ռիսկերը շատ ավելի մեծ են. «Մեր հարաբերությունները սպասարկվում են նաև ռուսական բանկերի միջոցով․ արդյոք այդ ռուսական բանկերի նկատմամբ որոշակի սահմանափակումներ մտցնելը անդրադառնալո՞ւ է նաև Հայաստանին՝ հայելային սահմանափակումներ դնելով, թե՞ ոչ։ Սրանք սցենարներ են, որոնք այս պահի դրությամբ որոշակի անորոշություններ են իրենց մեջ պարունակում, բայց, ամեն դեպքում, պետք է սպասել, հասկանալ»,- ընդգծեց Մարտին Գալստյանը:

Հարցին՝ «SWIFT» համակարգից Ռուսաստանին հեռացնելը ինչպես կազդի Հայաստանի բանկային համակարգի և ընդհանուր տնտեսության վրա, ԿԲ նախագահը կարճ պատասխանեց. «Մեկ բառով փորձեմ պատասխանել՝ ծանր»: