Իսրայելի արտգործնախարարը կանխատեսում է «Թահրիր» հեղափոխություն Իրանում

Միջազգային պատժամիջոցները կարող են ժողովրդական ապստամբություն բարձրացնել Իրանում, ինչպես դա եղավ Եգիպտոսում, ինչի հետևանքով նախագահ Հոսնի Մուբարաքը տապալվեց, կանխատեսել է Իսրայելի արտգործնախարար Ավիգդոր Լիբերմանը, տեղեկացնում է Israel National News-ի կայքը:

«Ընդդիմության ցույցերը, որոնք տեղի ունեցան Իրանում 2009թ. հունիսին, վերսկսվելու են ավելի մեծ ուժով», - նշել է Լիբերմանը Haaretz daily-ին տված հարցազրույցում:

«Իմ կարծիքով՝ լինելու է Իրանի ոճի Թահրիր հեղափոխություն»,-շեշտել է Իսրայելի ԱԳ նախարարը՝ վկայակոչելով Կահիրեի Թահրիր հրապարակում անցյալ տարի տեղի ունեցած զանգվածային բողոքի ցույցերը, որոնք ստիպեցին Մուբարաքին հրաժարական տալ:

«Իրավիճակն Իրանում, և սովորական մարդու զգացմունքները փողոցում տնտեսական աղետի մի մասն են: Հենց այս շաբաթ իրանական ռիալը հերթական անգամ ենթարկվեց արժեզրկման… Առաջին անհրաժեշտության ապրանքների կարիք կա, հանցագործության աճ, և մարդիկ փորձում են լքել երկիրը՝ փողեր ուղարկելով արտասահման», - նշել է Լիբերմանը:

Նա նաև հիշեցրել է վարչապետ Նեթանյահուի ելույթը ՄԱԿ-ի ԳԱ-ի դահլիճում. «Դուք կարող եք ծիծաղել, բայց բոլորը այժմ խոսում են «կարմիր գծի» մասին»:

Երկրորդ հարցազրույցում, որ ԱԳ նախարարը տվեց Channel 2 News Sunday-ին, նշեց, որ Իսրայելին գուցե անհրաժեշտ չլինի հարձակվել Իրանի միջուկային կետերի վրա, քանի դեռ տնտեսական պատժամիջոցները Իրանի Իսլամական Հանրապետության վրա արդյունավետ են: