Էրդողանը հույս ունի, որ Իսրայելի և Հայաստանի հետ իր աշխատանքը կազդի Վաշինգտոնում հայկական ու հրեական լոբբիի վրա

 Հայաստանի եւ Իսրայելի հետ հարաբերությունների կարգավորմանն ուղղված Թուրքիայի ջանքերն իրենցից դիվանագիտության տակտիկական փոփոխություն են ներկայացնում, այլ ոչ թե՝ արժեքների վրա հիմնված հանձնառություն բարեկամական հարաբերություններին, News.am-ի փոխանցմամբ` ասել է Վաշինգտոնում Ժողովրդավարությունների պաշտպանության հիմնադրամի (FDD) թուրքական ծրագրի ավագ տնօրեն Այքան Էրդեմիրը:

Թուրքիան եւ Հայաստանը հատուկ բանագնացներ են նշանակել՝ 1990-ականների սկզբից խզված դիվանագիտական ​​հարաբերությունների վերականգնման եւ ընդհանուր սահմանօի բացման համար։ Նրանք իրենց առաջին հանդիպումն անցկացրեցին Մոսկվայում հունվարի 14-ին:

Իսրայելի նախագահ Իսահակ Հերցոգը հաջորդ ամիս կարող է այցելել Անկարա այն բանից հետո, երբ Իսրայելը զգուշորեն ողջունեց Թուրքիայի տարածաշրջանային քաղաքականության եւ պաղեստինյան հարցում տարաձայնությունների պատճառով խզված հարաբերությունները վերականգնելու կոչերը:

«Էրդողանը հույս ունի, որ Իսրայելի եւ Հայաստանի հետ իր աշխատանքը մեծ ազդեցություն կունենա նրա վրա, ինչ նա շատ արդյունավետ լոբբի է կոչում, մասնավորապես՝ հայկական եւ հրեական լոբբիի Վաշինգտոնում եւ ընդհանրապես ԱՄՆ-ում», - ասել է Էրդեմիրը Ahval փոդքաստում: Նրա խոսքով՝ Էրդողանը հույս ունի, որ դա կարող է արագ լուծում լինել Թուրքիայի խնդիրների համար, ասել է Էրդեմիրը։

Էրդեմիրի խոսքով՝ թուրքական մոտեցումը շատ միամիտ է, քանի որ այն հաշվի չի առնում Վաշինգտոնում քաղաքականության մշակման բարդությունները։ «Էրդողանի կառավարության մարտավարական տեղաշարժերը, որոնք հիմնված են շատ միամիտ եւ պարզունակ ըմբռնման վրա, թե որքան բարդ արտաքին եւ անվտանգության քաղաքականության որոշումներ են կայացվում Միացյալ Նահանգներում, եւ կարծում եմ՝ կշարունակեն խոչընդոտներ ստեղծել նրանց քաղաքականության զարգացման եւ իրականացման համար»,- ասել է Էրդեմիրը: 

Էրդեմիրի խոսքով՝ Հայաստանի եւ Իսրայելի հետ հարաբերությունները կարգավորելու Թուրքիայի փորձերը հիմնված են նախագահ Ռեջեփ Թայիփ Էրդողանի՝ Եգիպտոսի, ապա Արաբական Միացյալ Էմիրությունների եւ վերջապես Սաուդյան Արաբիայի հետ կապերի հաստատման մոդելների վրա։

Էրդեմիրը նշել է, որ Թուրքիայի դիվանագիտական ​​ջանքերը տարածաշրջանում հիմնված են հետեւյալ հիմնական գործոնների վրա. նախ՝ Էրդողանը խոստովանել է, որ Թուրքիան գնալով ավելի է մեկուսացվում Միջերկրական ծովի արեւելյան հատվածում, ինչը ե՛ւ դիվանագիտական, ե՛ւ ռազմական խնդիր է ստեղծում: Թուրքիան նաեւ ձգտում է ընդլայնել իր մուտքը դեպի արտահանման շուկաներ եւ ավելի շատ ներդրումներ ներգրավել արտասահմանից, հատկապես՝ Պարսից ծոցի երկրներից, ֆինանսական ճգնաժամից հետո:

Անկարան կարծում է, որ Հայաստանի եւ Իսրայելի հետ իր հակամարտությունների միջազգային ընկալումը խաթարում է իր իմիջը եւ դիվանագիտական ​​ազդեցությունն ինչպես Վաշինգտոնում, այնպես էլ Բրյուսելում, այնպես որ նա նաեւ հույս ունի, որ կարգավորման ջանքերը կծառայեն Թուրքիայի փափուկ ուժի ամրապնդմանը եւ երկու մայրաքաղաքներում դիվանագիտական ​​դեֆիցիտի նվազեցմանը, ասել է Էրդեմիրը։ .