«Ես այդ աշխատանքով բավարարված չեմ, հետ եմ ուղարկել». Պապիկյանը՝ ԶՈՒ բարեփոխումների հայեցակարգի մասին

Ազգային ժողովի «Պատիվ ունեմ» խմբակցության պատգամավոր Տիգրան Աբրահամյանն այսօր՝ փետրվարի 9-ին, անդրադարձավ Զինված ուժերի բարեփոխումներին:

«Հետպատերազմյան ժամանակահատվածում Պաշտպանության բոլոր նախարարները խոսել են դրա անհրաժեշտության մասին, խոսել են այն մասին, որ հայեցակարգ է մշակվում, սակայն մինչև այս պահը հայեցակարգի հետ կապված որևէ տեղեկություն չկա: Այս հայեցակարգի գործի մեջ չդնելը մեծ վնաս է բերում պաշտպանական համակարգին: Ի վերջո, ի՞նչ ժամկետների մեջ է հայեցակարգը մշակվելու ու ե՞րբ է լինելու Պաշտպանության ու անվտանգության հանձնաժողովում», - հարց ուղղեց ընդդիմադիր պատգամավորը:

Ի պատասխան պաշտպանության նախարար Սուրեն Պապիկյանն ասաց, թե 2021-ին հաստատված է պաշտպանական գերատեսչությունում բարեփոխումների իրականացման ճանապարհային քարտեզը, որը ենթադրում է, որ կլինի հայեցակարգի մշակում, որը 2021-ի ավարտին արդեն իսկ մշակված է եղել ու պատրաստ է եղել շրջանառության, բայց բովանդակությունն այդքան էլ իր համար ոչ ամբողջությամբ է ընդունելի եղել. «Ես այդ աշխատանքով բավարարված չեմ ու հետ եմ ուղարկել վերախմբագրման: Աշխատանքի արդյունքները առաջիկայում կամփոփվեն, այն գաղտնի չէ, հնարավոր է մասնակցել քննարկումներին, ՊՆ-ն բաց է», - ասաց նա:

Նախարարի խոսքով՝ առաջիկայում շրջանառության մեջ կդնեն «Պաշտպանության նախարարության կառուցվածքի փոփոխության մասին» նախագիծը ու բաց են լսելու առաջարկներ ու քննադատություններ:

Տիգրան Աբրահամյանը հետաքրքրվեց նաև Ռազմարդյունաբերության կոմիտեից՝ նշելով, որ մեկ տարի երեք ամիս է, ինչ կոմիտեն ղեկավար չունի:

«Տարօրինակ իրավիճակ է ստեղծված, այս կարևոր կոմիտեի ղեկավարի պաշտոնում մեկ տարուց ավելի է` որևէ մարդ չի նշանակվում», - նշեց նա:

Պապիկյանն էլ ասաց, որ, այո, Ռազմարդյունաբերության կոմիտեն շատ կարևոր է ու այն տեղափոխելով Բարձր տեխնոլոգիական արդյունաբերության նախարարություն՝ խնդիր են ձևակերպել, որ Հայաստանում պետք է ունենանք ռազմական արդյունաբերություն:

«Այսինքն` ՊՆ-ն պետք է հանդիսանա պատվիրատու ու հիմնական շահառու, բայց մնացած պրոցեսները պետք է իրականացվեն մյուս նախարարությունում», - նշեց նա:

Ինչ վերաբերում է կոմիտեի նախագահին, ապա, Պապիկյանի խոսքով, այդ պաշտոնում պետք է նշանակվի փորձառու մարդ, որ սխալներ չլինեն: