Հայաստանի պետական ֆիլհարմոնիկ նվագախումբը հանդես կգա տարեվերջյան տոնական համերգներով

2011 թ.-ին Հայաստանի պետական ֆիլհարմոնիկ նվագախումբն իրականացրել է մի շարք հոբելյանական և տոնական նախագծեր. որոնց շարքում նշանավորվել են Երևանյան միջազգային երաժշտական 5-րդ հոբելյանական փառատոնի մեկնարկին նվիրված կարևորագույն տոների`Հայաստանի Հանրապետության անկախության 20 ամյակին և Հայաստանի պետական ֆիլհարմոնիկ նվագախմբի 85-ամյա հոբելյանին նվիրված համերգային ծրագրերը:

ՀՀ անկախության 20 ամյակին նվիրված` սեպտեմբերի 21-ին Հանրապետության հրապարակում նվագախումբը փայլուն կերպով ներկայացրել է «Հերոսական բալլադ» համերգային ծրագիրը` կազմված հայ անվանի կոմպոզիտորների ստեղծագործություններից: Համերգաշրջանի ընթացքում իրականացվել են հայ երաժշտարվեստում մեծագույն ավանդ ունեցող կոմպոզիտորների հոբելյաններին նվիրված հանդիսություններ, հնչել` բազմաթիվ հայ կոմպոզիտորների ստեղծագործություններ: Տարին նշանավորվել է նաև համաշխարհային մեծության երաժիշտների հետ համատեղ համերգների և երիտասարդությանն ուղղված ծրագրերի իրականացմամբ (բուհերի հետ համագործակցություն, դպրոցականների համար իրականացված հատուկ ծրագիր):

Ս. թ. օգոստոսին լույս է տեսել ՀՊՖՆ-ի հերթական ձայնասկավառակը՝ «Հայկական ռապսոդիա» խորագրով, որը ներառում է հայ կոմպոզիտորների հեղինակած չորս գործեր` Արամ Խաչատրյան՝ «Կոնցերտ-Ռապսոդիա» (թավջութակի և նվագախմբի համար), Սուրեն Զաքարյան՝ «Մոնոգրաֆ» (թավջութակի և կամերային նվագախմբի համար), Վաչե Շարաֆյան՝ «Սյուիտ» (թավջութակի և նվագախմբի համար), Կոմիտաս՝ «Կռունկ»: «Հայկական ռապսոդիա»-ն արդեն գրավել է եվրոպական երաժշտասեր հանրության և քննադատների ուշադրությունն, ինչպես նաև Լոնդոնի "Independent" հեղինակավոր պարբերականի կողմից արժանացել է «Շաբաթվա ձայնասկավառակ» կոչմանը:

Հայաստանի պետական ֆիլհարմոնիկ նվագախումբը մինչև տարեվերջ հանդես կգա ևս 4 տոնական համերգներով. դեկտեմբերի 16-ին կներկայացնի հռչակավոր կոմպոզիտոր Գյուստավ Հոլսթի՝ «Մոլորակներ» սյուիտը, ինչին առանձնահատուկ շուք կհաղորդի համակարգչային գրաֆիկան (Անդրանիկ Սուքիասյան): Համերգին մասնակցում են «Հովեր» պետական կամերային երգչախումբը` գեղ. ղեկ. և խմբավար Սոնա Հովհաննիսյան (համերգի ռեժիսոր Սուքիաս Թորոսյան, դիրիժոր Էդուարդ Թոփչյան):

Դեկտեմբերի 21-ին և 25-ին` Պյոտր Իլյիչ Չայկովսկու՝ «Շչելկունչիկ» բալետի համերգային կատարում, որը կուղեկցվի Հոֆմանի հանրահայտ հեքիաթի ընթերցմամբ (Աննա Միքայելյան) և հեքիաթը պատկերող գեղարվեստական նկարների էկրանավորմամբ (նկարիչ և ռեժիսոր Սուքիաս Թորոսյան): Համերգին մասնակցում են «Սպեղանի» մանկական երգչախումբը (գեղ. ղեկ. և խբավար Սարինե Ավթանդիլյան):

Դեկտեմբերի 24-ին կկայան Հայաստանի պետական ֆիլհարմոնիկ նվագախմբի՝ 85-ամյակին նվիրված Գալա համերգը (մենակատար Սերգեյ Խաչատրյան, ջութակ):

Ս. թ. դեկտեմբերի 14-ին, Արամ Խաչատրյան համերգասրահում կայացած` Հայաստանի պետական ֆիլհարմոնիկ նվագախմբի առաջիկա ծրագրերին և տարեվերջյան ամփոփիչ արդյունքներին նվիրված ասուլիսին մասնակցում էին Էդուարդ Թոփչյանը (ՀՊՖՆ գեղարվեստական ղեկավար և գլխավոր դիրիժոր), Սուքիաս Թորոսյան (ռեժիսոր, նկարիչ):