«Հայագրոֆորում» խորագրով համաժողով

Հայաստանի Հանրապետության անկախության 20-րդ տարեդարձին նվիրված միջոցառումների շրջանակներում ՀՀ գյուղատնտեսության նախարարության կողմից ս.թ. հոկտեմբերի 14-16-ը կազմակերպվում է հայ ֆերմերների առաջին «Հայագրոֆորում» խորագրով համաժողով:

Այսօր համաժողովի անցկացման առաջին օրը, միջոցառման աշխատանքները մեկնարկեցին Կ. Դեմիրճյանի անվան մարզահամերգային համալիրում: Համաժողովին ընդհանուր առմամբ ներկա են շուրջ 1000 մասնակիցներ, որոնցից 700-ը ներկայացնում են ՀՀ մարզերում գործող գյուղացիական տնտեսությունները, կոոպերատիվները, վերամշակող կազմակերպությունները, միությունները և ասոցիացիաները:

Սփյուռքը ներկայացնում են՝ 40 ֆերմերներ Ռուսաստանից, Ուկրաինայից, Վրաստանից, Լիբանանից, Իրանից, Լեհաստանից, Լատվիայից, ԱՄՆ-ից և Ֆրանսիայից:

Հոկտեմբերի 15-ի առավոտյան ՀՀ գյուղատնտեսության նախարարությունում նախատեսվում է համաժողովի՝ արտասահմանից ժամանած մասնակիցների հանդիպումը ՀՀ գյուղատնտեսության և ՀՀ սփյուռքի նախարարների հետ: Հանդիպման ընթացքում կքննարկվեն գյուղատնտեսության ոլորտում հետագա համագործակցությանն առնչվող տարբեր հարցեր, կստորագրվի փաստաթուղթ, որով կամրագրվի ագրոպարենային բնագավառի գործարարների և ֆերմերների համահայկական ընկերակցության ստեղծումը:

Հանդիպումից հետո համաժողովի մասնակիցները կայցելեն Ծիծեռնակաբերդ՝ հայոց ցեղասպանության զոհերի հուշակոթող և ցեղասպանության թանգարան:

Օրվա երկրորդ կեսին համաժողովի մասնակիցները ներկա կգտնվեն Արարատի մարզում «Բերքի տոնի» առիթով կազմակերպվող միջոցառումներին, ինչից հետո նախատեսվում են այցելություններ արտադրական ձեռնարկություններ:

Համաժողովի անցկացման երրորդ օրը՝ հոկտեմբերի 16-ը, այս տարի համընկնում է առաջին անգամ նշվող «Հայաստանի Հանրապետության գյուղատնտեսության աշխատողի օր» տոնի հետ, որը, ըստ սահմանված կարգի, այսուհետ նշվելու է յուրաքանչյուր տարվա հոկտեմբերի երրորդ կիրակի օրը:

Մայրաքաղաքում նախատեսված տոնական միջոցառումները կանցկացվեն Հյուսիսային պողոտայում: Այստեղ նախատեսվում է գյուղատնտեսական ապրանքների ցուցահանդես, որի շրջանակներում կկազմակերպվի համտես (գինու, պանրի, պահածոների և մեղրի), մշակութային միջոցառումներ, բեմական ներկայացումներ և այլն:

Տոնի շրջանակներում Հայաստանի մարզերում նույնպես կանցկացվեն տարբեր միջոցառումներ, տոնավաճառներ, ցուցահանդեսներ, բերքի տոներ, համերգային ծրագրեր։

Նույն օրը, երեկոյան, Կ. Դեմիրճյանի անվան մարզահամերգային համալիրում ժամը 19:00-ին կներկայացվի համերգային ծրագիր, որը ուղիղ եթերով կհեռարձակվի Հայաստանի հանրային հեռուստատեսությամբ:

Տոնական միջոցառումների հովանավորներն են Վիվասել-ՄՏՍ ընկերությունը և Զանգեզուրի պղնձամոլիբդենային կոմբինատը: