Հայ կոմպոզիտորական արվեստի փառատոնը` Դրեզդենի «Ֆրաուենկիրխե» եկեղեցում

ՀՀ նախագահ Սերժ Սարգսյանի բարձր հովանու ներքո, ՀՀ մշակույթի նախարարության աջակցությամբ, Հայաստանի պետական երիտասարդական նվագախումբը, Հայաստանի կոմպոզիտորների և երաժշտագետների միության հետ 2010 թ. անցկացնում են հայ կոմպոզիտորական արվեստի փառատոն: Փառատոնն այս տարի ընդլայնել է իր աշխարհագրությունը. սեպտեմբերի 29-ին Դրեզդենի «Ֆրաուենկիրխե» եկեղեցում տեղի է ունեցել Դրեզդենի ֆիլհարմոնիկ նվագախմբի և Հայաստանի պետական կամերային երգչախմբի համատեղ համերգը, որը ղեկավարում էին Հայաստանի պետական կամերային երգչախմբի գեղարվեստական ղեկավար և գլխավոր դիրիժոր Ռոբերտ Մլքեյանը և Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:

Ծրագրում ընդգրկված էին հայ և համաշխարհային դասականների ստեղծագործություններ' Կոմիտաս, Տ. Մանսուրյան, Է. Հայրապետյան, Ս. Բարբեր, Ա. Շնիտկե: Դրեզդենի ֆիլհարմոնիկ նվագախումբը Եվրոպայի հնագույն նվագախմբերից է, շուրջ 135 տարեկան և հանդիսանում է աշխարհի լավագույն նվագախմբերից մեկը աշխարհում: Նվագախումբը մշտապես հյուրախաղերով հանդես է գալիս եվրոպական մի շարք երկրներում, Չինաստանում, Ճապոնիայում, Իսրայելում, ԱՄՆ-ում: Դրեզդենում կոլեկտիվը հանդես է գալիս ավելի քան 80 համերգով:Ս. թ. հոկտեմբերի 2-ին, ժամը 13:00-ին ՀՀ մշակույթի նախարարությունում դրեզդենյան համերգին նվիրված մամուլի ասուլիսին մասնակցում էին ՀՀ մշակույթի նախարարության ժամանակակից արվեստի վարչության գլխավոր մասնագետ Արմենուհի Ղազարյանը, Հայաստանի պետական կամերային երգչախմբի գեղարվեստական ղեկավար և գլխավոր դիրիժոր Ռոբերտ Մլքեյանը, Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, կոմպոզիտոր Էդուարդ Հայրապետյանը: