Արուտչյանների հոբելյանական ցուցահանդեսը՝ Հայաստանի ազգային պատկերասրահում

Հայաստանի ազգային պատկերասրահում կազմակերպվում է Արուտչյանների հոբելյանական ցուցահանդեսը: Առաջին անգամ գեղարվեստական այս ընտանիքի ներկայացուցիչների ստեղծագործությունները կցուցադրվեն միասին:

Այս տարի լրանում է ժողովրդական նկարիչներ Միքայել Արուտչյանի ծննդյան 115-ամյակը, Սերգեյ Արուտչյանի 100-ամյակը և Ռուբեն Արուտչյանի 65-ամյակը:

Ցուցահանդեսում կներկայացվեն ստեղծագործություններ Հայաստանի ազգային պատկերասրահի, Եղ.Չարենցի անվ. Գրականության և արվեստի թանգարանի, Եղ. Չարենցի տուն-թանգարանի , ինչպես նաև Արուտչյանների ընտանիքի հավաքածուներից:

Ցուցահանդեսի բացման արարողությունը տեղի կունենա Հայաստանի ազգային պատկերասրահում հոկտեմբերի 6-ին, ժ.14-ին: Հանրությանը կներկայացվի նաև հոբելյարներին նվիրված նոր լույս տեսած ալբոմը:

Արուտչյան Միքայել Ավետի, 1897 Շուշի – 1961 Մոսկվա

Ժողովրդական նկարիչ, գրաֆիկ, կինոյի և թատրոնի նկարիչ:

Ձևավորել է ավելի քան 90 թատերական բեմադրություններ, բազմաթիվ գրքեր և մի շարք հայկական ֆիլմեր: Բազմաթիվ արվեստաբանական հոդվածների հեղինակ է:

Արուտչյան Սերգեյ Ավետի, 1912 Բաքու – 1986 Երևան

Ժողովրդական նկարիչ, գրաֆիկ, կինոյի և թատրոնի նկարիչ, պլակատի և երգիծական նկարիչ:

Ձևավորել է բազմաթիվ բեմադրություններ Գ. Սունդուկյանի անվ. Դրամատիկական և Լենինականի Ա.Մռավյանի անվ. Դրամատիկական թատրոններում: Բազմաթիվ քաղաքական պլակատների և ընկերական շարժերի հեղինակ: “Ոզնի” ամսագրի գլխավոր նկարիչ եղած ժամանակ հանդես էր գալիս ծաղրանկարներով նաև:

Արուտչյան Ռուբեն Սերգեյի՝ ծնվ. 1947թ.

Հայաստանի Հանրապետության վաստակավոր նկարիչ, գեղանկարիչ, գրաֆիկ:

Ստեղծագործում է բոլոր ժանրերում: Ցուցահանդեսներին մասնակցում է 1974թ-ից: Նրա անհատական ցուցահանդեսները կազմակերպվել են ինչպես Հայաստանում, այնպես էլ արտերկրներում; Ձևավորել է բազմաթիվ ինտերիերներ, գեղարվեստական պաննոների հեղինակ է: Շուշիի զինանշանի, ՀՀ և Լեռնային Ղարաբաղի հանրապետության զինանշանների հեղինակ է: Ռ.Արուտչյանը հայկական 50 000 թղթադրամի և բազմաթիվ հուշադրամների հեղինակ է: Երկու անգամ եղել է Երևանի գլխավոր նկարիչ: Վերջերս պարգևատրվել է Լեռնային Ղարաբաղի «Երախտագիտություն» մեդալով: