Հանդիպման վայրը՝ գրադարան

ՀՀ կառավարության որոշմամբ 2004 թվականից Հայաստանի Հանրապետությունում հոկտեմբերի 7-ը պաշտոնապես նշվում է որպես «Գրադարանավարի օր»: Արդեն երրորդ տարին է' «Գրադարանավարի օրվա» կապակցությամբ ՀՀ մշակույթի նախարարության նախաձեռնությամբ և աջակցությամբ «Հայ գրատպություն-500» և «Երևանը' գրքի համաշխար­հային մայրաքաղաք» միջոցառումների շրջանակներում Հայաստանի Հանրա­պետության գրադարաններում անցկացվում է «Հանդիպման վայրը' գրադա­րան» խորագրով ծրագիրը:

Ավանդական և սիրելի դարձած ծրագիրն այս և հաջորդող տարիներին անցկացվելու է հոկտեմբերի 7-ին նախորդող շաբաթ երեկոյան ժամը 18:00-23:00-ն:«Հանդիպման վայրը' գրադարան» ծրագրի նպատակն է ընդգծել գրքի, գիտելիքի, գրադարանների դերը, ընթերցանության կարևորությունն արդի տեխնոլոգիաների ժամանակաշրջանում, ինչպես նաև նպաստել գրքի և գրականության տարածմանն ու նորովի ներկայացմանը: Մեր օրերում գրադարանները ոչ միայն գիրք տրամադրող կազմակերպություններ են, այլև տարածաշրջանի համար ժամանցի կազմակերպման կենտրոն, երկխոսությունների միջավայր գրադարանավարի, ընթերցողի, հեղինակի, հրատարակչի միջև:

Գրադարաններն առանձնահատուկ են պատրաստվում այդ օրվան' կազմակերպելով բազմաբնույթ միջոցառումներ. կլոր սեղաններ, գրադարանային խնդիրների քննարկումներ, հանդիպումներ գիտության, մշակույթի, գրականության նշանավոր անձանց հետ: Կկազմակերպվեն նաև գրքերի շնորհանդեսներ, գրական ստեղծագործությունների թատերական բեմականացումներ, գրական-երաժշտական երեկոներ, գրքի տոնավաճառներ:

«Հանդիպման վայրը' գրադարան» խորագրով ծրագիրն այս տարի նույնպես կանցկացվի Հայաստանի ազգային գրադարանում, Խնկո-Ապոր անվան ազգային մանկական գրադարանում, երաժշտագիտական գրադարանում, Երևանի Ավ. Իսահակյանի անվան կենտրոնական գրադարանում, ՀՀ մարզային և համայնքային գրադարաններում: