Ռուսաստանի եւ Թուրքիայի նախագահները հեռախոսազրույց են ունեցել Ուկրաինայի թեմայով

Ռուսաստանի Դաշնության նախագահ Վլադիմիր Պուտինի եւ Թուրքիայի Հանրապետության Նախագահ Ռեջեփ Թայիփ Էրդողանի միջեւ մարտի 6-ին կայացած հեռախոսազրույցի ընթացքում Վլադիմիր Պուտինը տեղեկացրել է Դոնբասի պաշտպանության հատուկ ռազմական գործողության ընթացքի մասին, այդ համատեքստում շարադրել սկզբունքային մոտեցումներն ու գնահատականները, մանրամասն պարզաբանել է առաջադրված հիմնական նպատակներն ու խնդիրները: Ընդգծվել է, որ հատուկ գործողությունն ընթանում է ըստ պլանի եւ ժամանակացույցի։  Այս մասին հայտնում է ՌԴ նախագահի պաշտոնական կայքը:

«Ընդ որում, ռուսական զինված ուժերն անում են հնարավորը խաղաղ քաղաքացիների կյանքը պահպանելու եւ անվտանգությունն ապահովելու համար, կետային հարվածները հասցվում են բացառապես ռազմական ենթակառուցվածքի օբյեկտներին։ Այս ֆոնին առանձնահատուկ դաժանությամբ եւ ցինիզմով են աչքի ընկնում ազգայնական, նեոնացիստական կազմավորումների գործողությունները, որոնք շարունակում են Դոնբասի ինտենսիվ գնդակոծությունները եւ ուկրաինական քաղաքներում ու բնակավայրերում օգտագործում են որպես «կենդանի վահան» քաղաքացիական անձանց, այդ թվում՝ փաստացի պատանդ վերցված օտարերկրացիների:

Հաստատվել է հակամարտության կարգավորման նպատակով ռուսական կողմի՝ ուկրաինական իշխանությունների և արտասահմանյան գործընկերների հետ երկխոսության պատրաստակամությունը։ Դրա հետ մեկտեղ, ուշադրություն է դարձվել բանակցային գործընթացը ձգձգելու ցանկացած փորձերի անհեռանկարային լինելուն, ինչն օգտագործվում է ուկրաինացի ուժայինների կողմից իրենց ուժերն ու միջոցները վերախմբավորելու համար: Այդ կապակցությամբ ընդգծվել է, որ հատուկ գործողության կասեցումը հնարավոր է միայն Կիևի կողմից մարտական գործողությունների դադարեցման և Ռուսաստանի լավ հայտնի պահանջների կատարման դեպքում»,- ասվում է մամուլի հաղորդագրությունում։