Բժեզինսկին խոսել է Իրանի դեմ պատերազմի հնարավոր հետևանքների մասին

Միացյալ Նահանգների նախագահի անվտանգության հարցերով նախկին խորհրդական՝ ամերիկյան հայտնի քաղաքագետ Զբիգնեւ Բժեզինսկին, հայտարարել է, որ Իրանի հետ ԱՄՆ–ի հնարավոր պատերազմի սկսումն աղետալի կլինի Միացյալ Նահանգների համար։ Նման հայտարարությամբ՝ ինչպես հաղորդում է «France-Presse» լրատվական գործակալությունը, Բժեզինսկին հանդես է եկել դեկտեմբերի 13-ին՝ Վաշինգտոնի քաղաքական գիտությունների կենտրոնում տեղի ունեցած Ատլանտյան խորհրդի նիստում։

Ըստ Բժեզինսկու՝ Իրան–ԱՄՆ պատերազմի հետեւանքներն աղետալի կլինեն, ոչ միայն ԱՄՆ–ի, այլ նաև ամբողջ աշխարհի համար։

Քաղաքագետն իր մտավախությունն է հայտնել, որ իսկապես ԱՄՆ-ն կարող է պատերազմ սկսել Իրանի դեմ։ Վերջինս նշել է, որ միջազգային հանրությունը ամեն կերպ փորձում է ազդել Իրանի միջուկային ծրագրի վրա, որի հարցում Միացյալ Նահանգներն իր սեփական հնարավոր միջոցներն է կիրառում Իրանի դեմ։

Բժեզինսկին ընդգծել է, որ ամերիկացիներին պետք է ավելի լավ հասկանալ և ընկալել Միացյալ Նահանգների արտաքին քաղաքականության գերակա խնդիրները։ «Մեր ժողովուրդն ապրում է համատարած վախի, տգիտության և դեմագոգիայի մթնոլորտում», – ասել է Բժեզինսկին։

Ըստ նրա՝ այդ ամենը պարալիզացնող ազդեցություն է թողնում երկրում ողջամիտ քաղաքականություն վարելու վրա։ Ինչպես ընդգծել է Բժեզինսկին, նախագահ Բարաք Օբաման եւ դեմոկրատական կուսակցության նրա կողմնակիցները չեն կարողանում արդյունավետ կառավարել և իրենց լիդերությունը էֆեկտիվորեն կիրառել, միևնույն ժամանակ հանրապետականները չեն կարողանում պաշտպանել ծայրահեղական մոտեցումները։

Նոյեմբերին Իրանի վրա ԱՄՆ–ի հնարավոր հարձակման «անկանխատեսելի հետևանքների» մասին զգուշացրել էր ԱՄՆ-ի պաշտպանության քարտուղար Լեոն Պանետան։

ԱՄՆ նախագահի պաշտոնի համար պայքարող մի շարք հանրապետական թեկնածուներ Իրանի հարցի շուրջ հանդես են եկել կոշտ հայտարարություններով։ Նախկին սենատոր Ռիք Սանտորումը հայտարարել է, որ Իրանի միջուկային ծրագրի իրագործման վրա աշխատող յուրաքանչյուր գիտնականի, այդ թվում՝ օտարերկրյա գիտնականին, Միացյալ Նահանգները պետք է ընկալի՝ որպես իր ոխերիմ թշնամի. «Ռուսաստանում եւ Իրանում հայտնաբերվել են մահացած գիտնականներ», - ասել է Սանտորումը և ավելացրել՝ «... Հուսով եմ, որ Միացյալ Նահանգները տեղյակ է այդ մասին»։ Կոնգրեսի ներկայացուցիչների պալատի նախկին խոսնակ Նյուտ Գինգրիչը հայտարարել է Իրանի ամենամեծ նավթավերամշակման գործարանում Միացյալ Նահանգների հատուկ ծառայությունների կողմից դիվերսիոն գործողություններ կազմակերպելու խիստ անհրաժեշտության մասին։

Ամերիկացիների շրջանում նոյեմբերին անցկացված հարցումների համաձայն՝ հարցվածների 50%-ը կարծում է, որ ԱՄՆ–ը պետք է ռազմական գործողություններ սկսի Իրանի դեմ, վերջինիս միջուկային ծրագիրը խափանելու համար։

Բժեզինսկին 1977-1981թթ. աշխատել է՝ որպես ԱՄՆ նախագահի ազգային անվտանգության հարցերով խորհրդական։ 2007թ–ի ԱՄՆ նախագահական ընտրություններին Բժեզինսկին պաշտպանել է Բարաք Օբամայի թեկնածությունը։