Քանի ժամ է՝ սոված և կեղտոտ նստած ենք. հաց գնելու խնդիր էլ ունենք. արցախցին ստեղծված իրավիճակի մասին

Ինչպես գիտենք մարտի 8-ի գիշերը 01:00-ից Արցախում դադարել է գազամատակարարումը: Ըստ լուրերի՝ ադրբեջանցիները դիտավորյալ են պայթեցրել գազամատակարարման խողովակը և խոչընդոտում են ադրբեջանական դիրքի մոտ վնասված մայրուղային գազատարի վերանորոգման աշխատանքները սկսելուն: 

Պարզելու, թե ինչ վիճակում են գտնվում արցախցիները ԼՈՒՐԵՐ.com-ը զրուցեց բնակիչներից մեկի հետ, որը չցանկացավ ներկայանալ:

Մեր աղբյուրի փոխանցմամբ՝ արդեն քանի օր է, ինչ առանց հաց են և անգամ չեն կարողանում լոգանք ընդունել.

«Քանի ժամ է՝ սոված և կեղտոտ նստած ենք»,- ընդգծեց նա:

Ըստ վերջինիս՝ ունեն նաև հացի գնման խնդիր, առաքիչները դադարել են այն խանութներ առաքելը.

«Մեզ մոտ հացի փռերի դիմաց կմ-երով հերթեր են, թե ինչու ենք նման խնդրրի առջև կանգնել, չգիտենք»,- ասաց մեր զրուցակիցը:

Իսկ վերջում կես կատակ կես լուրջ հավելեց. «Ինչպես նշում է մեր նախագահը, հայի ոգին տոկուն է, ամեն ինչ անում են, որ թողնենք, գնանք, բայց մենք չենք գնալու: Ճիշտ է, ֆիզիկապես կեղտոտ և սոված ենք, բայց, մեկ է, չենք լքելու Արցախը»,- եզրափակեց նա:

Զրուցեցինք նաև սահմանամերձ գյուղերից Նորշենի ղեկավար Գևորգ Հարությունյանի հետ, որը նշեց բնակիչները էլեկտրական տաքացուցիչներ են օգտագործում, սակայն կան նաև տներ, որոնք չունեն.

«Դե գյուղ տեղ է էլի, մի բան անում են, նորմալ է էլի»,- նշեց նա:

Վերջինս հավելեց, որ կան բնակիչներ, որոնք հասկանում են ստեղծված վիճակը և սպասում են՝ երբ այն կկարգավորվի, սակայն որոշներն էլ բորբոքվում են և բողոքում: 

Համայնքի ղեկավարը նաև նշեց, որ լուրեր են շրջանառվում այն մասով, թե հնարավոր է՝ այսօր գազը միացնեն:

Զվարթ Պետրոսյան