Լորիս Ճգնավորյանի որդին՝ Էմմանուել Ճգնավորյանը, ազատվել է պարտադիր զինվորական ծառայությունից

ՀՀ կառավարության այսօրվա նիստում հաստատված որոշմամբ կոմպոզիտոր, դիրիժոր Լորիս Ճգնավորյանի որդին` Էմմանուել Լորիսի Ճգնավորյանն ազատվեց պարտադիր զինվորական ծառայությունից։

Էմմանուել Ճգնավորյանը ծնվել է 1995 թվականի ապրիլի 22-ին Ավստրիայում: Այսօր նա միջազգային առաջատար երաժշտական հարթակների պահանջված երաժիշտներից է:

«Էմմանուել Ճգնավորյանն այսօր միջազգային առաջատար երաժշտական հարթակների ամենից պահանջված երաժիշտներից է: Նա դեռեւս 2016-ին ստացել է պարտադիր զինվորական ծառայության զորակոչից տարկետում: Տարկետում ստանալուց հետո Էմմանուել Ճգնավորյանը շարունակել է իր գործունեությունը»,-նշված է որոշման մեջ:

Որպես կոմպոզիտոր և դիրիժոր Լորիս Ճգնավորյանի որդին՝ Էմմանուելը երաժշտությամբ սկսել է զբաղվել վաղ հասակից և իր արվեստում միավորել է երաժշտական և մշակութային աշխարհները:

2021/22թթ. համերգաշրջանում նա ղեկավարելու է Գրացի ֆիլհարմոնիկ, Tonkünstler Orchestra, Հեյլբրոննի Württembergisches Kammerorchester, Լինցի Bruckner Orchestra և այլ նվագախմբերը:

Radio Klassik Stephansdom-ը Ճգնավորյանին ճանաչել է որպես երաժշտության պերճախոս մեկնաբան: 2017-ից նշյալ ռադիոկայանում նա վարել է իր «Der Klassik-Tjek» հաղորդումը:

Որպես մենակատար ջութակահար Ճգնավորյանը մոտ ապագայում հանդես է գալու Filarmonica della Scala (դիրիժոր՝ Ռիկարդո Շայի), Սանկտ Պետերբուրգի ֆիլհարմոնիկ (դիրիժոր՝ Յուրի Տեմիրկանով), Accademia Nazionale de Santa Cecilia (դիրիժոր՝ Սակարի Օրամո) և այլ նվագախմբերի հետ:

Essen Philharmonic-ը 2021/22 համերգաշրջանում Էմմանուել Ճգնավորյանին է նվիրել «Արտիստի դիմանկարը» ծրագիրը, իսկ որպես մշտական հրավիրյալ արտիստ՝ «Artist in Association», Ճգնավորյանը հանդես է գալու Վյուրտեմբերգի կամերային նվագախմբի հետ:

Էմմանուել Ճգնավորյանը նվագում է Անտոնիո Ստրադիվարիի 1698-ին կերտած ջութակով, որը նրան տրամադրել է Լոնդոնի Beare’s International Violin Society-ի հովանավորը:

Հայաստանի երաժշտական ոլորտում նրա պահանջվածությունն ու համատեղ աշխատանքի հեռանկարները հաշվի առնելով, առաջարվեց Էմմանուել Լորիսի Ճգնավորյանին ազատել պարտադիր զինվորական ծառայությունից: