Մոսկվայում կկայանա հայ-ադրբեջանական հարաբերությունների մասին պատմող ֆիլմի պրեմիերան (տեսանյութ)

Լեռնային Ղարաբաղում 20 տարի առաջ`պատերազմի տարիներին հայ և ադրբեջանցի զինվորների մասին պատմող «Ընդհատված երգ» գեղարվեստական ֆիլմի պրեմիերան կկայանա նոյեմբերի 10-ին Ռուսասատանի Կինեմատոգրաֆների միության Մոսկովյան կինոյի տանը: Պրեմիերային ներկա են գտնվելու ինչպես հայկական և ադրբեջանական համայնքերի ներկայացուցիչներ, այնպես էլ մշակույթի և արվեստի հայտնի ռուս գործիչներ. այս մասին հայտարարել է ֆիլմի մամուլի քարտուղար Քրիստինա Մարանդի-Նաչկեբիան:

Նա հիշեցրել է, որ ֆիլմի հեղինակները Մոսկվայի հայեր են, ովքեր որոշել են կինոյի լեզվով պատմել ղարաբաղյան հիմնահարցում հայ-ադրբեջանական հարաբերություններում առկա խնդիրների մասին:

Անդրադառնալով ֆիլմի ցուցադրման ձգձգման հարցին (նկարահանման աշխատանքները սկսվել են անցյալ տարվա հունվարից)՝ նրա հեղինակները հանդես են եկել հայտարարությամբ, որում ասվում է, որ դա պայմանավորված է կազմակերպված սադրանքներով, որի արդյունքում ֆիլմի նկարահանման հետագա աշխատանքներից հրաժարվել է ադրբեջանցի դերասանը:

Չնայած բոլոր բարդություններին՝ «Ընդհատված երգ»-ի հեղինակները հավատարիմ են մնացել ֆիլմի սկզբնական գաղափարին:

Ֆիլմը նկարահանվել է բացառապես մասնավոր միջոցներով: Նկարահանող խումբը հրաժարվել է ցանկացած արտաքին ֆինանսավորումից, քանի որ բոլոր նմանատիպ առաջարկները ենթադրում էին սյուժեի աղավաղում:

«Զենքի և անիմաստ սպառնալիքների ժամանակաշրջանը վաղուց պետք է անցյալում մնա: Հակամարտող կողմերը պետք է իրենց մեջ քաջություն և համարձակություն գտնեն և գնան բանակցությունների, որպեսզի արյուն չթողնեն գալիք սերունդներին»,-հայտարարում են ֆիլմի նկարահանողները: