Զինծառայողի մահը սպանությո՞ւն էր, թե՞ ինքնասպանություն

Դատաբժշկական փորձագիտական կենտրոնում ավարտվել է Ստեփանավանի զորամասում մահացած զինծառայող Մնացական Մնացականյանի դիահերձումը:

Դիահերձմանը ներկա է եղել անկախ փորձագետ`Հելսինկյան ասոցացիայի անդամ Ռուբեն Մարտիրոսյանը:

Լուրեր.com–ի հետ զրույցում Մարտիրոսյանը նշեց, որ գործում կա կարևոր հակասություն. «Համաձայն Մնացական Մնացականյանի զորամասի փոխհրամանատարի`Մնացականյանը վերջին շաբաթվա ընթացքում դեպրեսիայի մեջ է եղել, և իբրև հրամանատարությունը զինվորին նույնիսկ հոգեբանի մոտ ստուգման է տարել, վերջինս էլ ասել է, թե ամեն ինչ նորմալ է։ Նրանք ասում են, որ Մնացականը ուրախ կյանք և ծառայություն է վարել վերջին օրերին, և որ մայրը մահվան նախօրեին խոսել է երեխայի հետ, և վերջինս եղել է լավ տարամադրության մեջ, ուրախ զրուցել է ծնողների հետ»։

Փորձագետը Լուրեր.com–ի հետ զրույցում պատմել է, որ դիակի զննությունը թույլ չի տալիս հստակ ասել՝ տղան ինքնասպանություն գործել է, թե նրան կախել են, քանի որ դիակի վրա չեն հայտնաբերվել մահվան հետ կապ ունեցող բացահայտ հետքեր:

«Այս պահի դրությամբ չենք կարող ասել` ինքնասպանություն է, թե`սպանություն։ Չենք կարող ասել, քանի որ չունենք ոչ պակաս կարևոր մի շարք փորձաքննությունների արդյունքներ. առաջին հերթին պետք է հագուստի փորձաքննությունը` որոշելու համար` բռնություն գործադրվել է Մնացականյանի նկատմամբ, կան պատռվածքներ, արյան հետքեր, թե`ոչ։ Սա ևս չի բացառվում»,–ասաց Մարտիրոսյանը։

Նա նշեց, որ պետք է հասկանալ, թե Մնացականն ինչպես է կարողացել մոտ երկու մետր բարձրությունից կախվել. «Պետք է պարզվի, թե ինչ հարմարանք է դրված եղել։ Երբ ծնողները գնացել են այդ սենյակ, որտեղ կախված են գտել Մնացականին, այնտեղ ոչ մի առարկա, աթոռ կամ այլ հարմարանք չի եղել, որ Մնացականը կարողանար կախվել, իսկ առանց դրա ամենայն հավանականությամբ կախվել նա չէր կարող»։

Մարտիրոսյանը նշեց նաև, որ այս պահի դրությամբ հարցը պետք է թողնել կախված վիճակում և հետագայում, եթե համապատասխան փաստեր ձեռք բերվեն, նոր դրանց անդրադառնալ։

Փորձագետի համար մահվան դեպքը շատ հանելուկային է։ Բայց միանշանակ մահվան պատճառները պետք է փնտրել միմիայն ծառայության մեջ, քանի որ Մնացականը ընտանեկան խնդիրներ չի ունեցել, եղել է ընտանիքի միակ որդին՝ ֆիզիկապես առողջ, ուժեղ և մեծ սրտի տեր.«Նրա սիրտը հարյուր հիսուն գրամ ավելի է, քան այդ տարիքի երիտասարդների սիրտը»։

Նշենք, որ Հոկտեմբերի 1-ին ոչ մարտական պայմաններում զոհվել է ՀՀ ԶՈւ N զորամասի ժամկետային զինծառայող, շարքային 18-ամյա Մնացական Մնացականյանը:

Ինչպես հայտնել էին ՊՆ–ից, զինծառայողը զոհվել է ՀՀ սահմանի և հայ ժողովրդի անվտանգությունն ապահովելու ընթացքում:

Ավելի ուշ Արտակ Նազարյանի քույրը՝ Ծովինար Նազարյանը, Facebook սոցցանցի իր էջում գրեց, որ պարզվել է, որ այս առավոտ Ստեփանավանում կախ(վ)ած զինծառայող Մնացական Թորգոմի Մնացականյանը Արտակ Նազարյանի գործով առանցքային վկա է։

«Մնացականյանը եղբորս` հենակետի խոհարար Արման Արշակի Մնացականյանի հորեղբոր տղան է։ Սա այն վկան էր, որի ծառայությունը երկարացրին, որպեսզի ՌՈ իշխանության տակ մնա դատարանում հարցաքննվելիս, զորացրվելուց հետո իրեն անհետացրին, գործը տեղափոխեցին Իջևան, մեղադրանքի կողմը ուժեղացրին՝ ևս մի դատախազ ներգրավելով, հետո 7 ամիս չէին կարողանում բերման ենթարկել՝ Վաղարշապատի ոստիկանության տված բժշկական տեղեկանքներով, թե վատառողջ է կամ էլ արտասահմանում բուժման է, իսկ ԱԱԾ-ից մեր հարցմանը պատասխանեցին, որ նա երբևէ չի լքել ՀՀ սահմանները, ու վերջապես եկավ, երկու բառ էլ կմկմաց ու գնաց...»։

Փորձագետ Մարտիրոսյանը, անդրադառնալով հարցին, թե հնարավոր կապ տեսնում է Նազարյանի և Մնացականյանի գործի մեջ, ասաց, որ չունենալով ոչ մի փաստ, ճիշտ չէ այդպիսի կապ փնտրելը։

«Եթե հետագայում կապ լինի, ես կհայտնեմ, բայց հիմա նման կապ տեսնել ես չեմ կարող։ Չունեմ հիմքեր և կասկածներ նման տեսակետ հայտնելու համար։ Չնայած չի բացառվում, որ Մնացականյանը կարող է սպանված լինել»,-եզրափակեց Մարտիրոսյանը։

Գայանե Համբարձումյան