Ասադը հրաժարվում է խաղաղությունից, իսկ Հիջաբը` Ասադից

Սիրիայի նախագահ Բաշար ալ Ասադը չի գնալու ընդդիմության հետ բանակցությունների:

Սիրիական ուժային կառույցների վերնախավը ոչնչացրած հուլիսյան ահաբեկչությունից հետո այն ժամանակ երկրի վարչապետ Ռիադ Հիջաբը փորձ կատարեց ազդել Ասադի վրա` գնալ բանակցությունների: «Չի լինելու ոչ մի խաղաղ լուծում»,-հայտարարեց Բաշար ալ Ասադը: Անհաջողության մատնված Հիջաբը դիմեց փախուստի և միացավ ապստամբներին։

Սիրիայի նախագահ Բաշար ալ Ասադը չի գնալու խաղաղ բանակցությունների ո՛չ երկրի ներսում իր դեմ պայքարող, ո՛չ էլ գաղթած ապստամբական ուժերի հետ: Այս դիրքորոշման մասին «Ալ Արաբիա» հեռուստաընկերությանը պատմել է նախկին վարչապետ Ռիադ Հիջաբը, ով օգոստոսին փախել էր Հորդանան:

«Ասադը բանակցության գաղափարը կտրուկ մերժեց: Նա հրաժարվում է բանակցել ինչպես երկրի ներսում, այնպես էլ երկրի սահմաններից դուրս գործող ապստամբական ուժերի հետ՝ հայտարարելով, որ ոչ մի բանակցություն չի վարելու պառակտված ապստամբության հետ, որը փորձում է իրեն տապալել: Այդ ընդդիմությունը հակահայրենասիրական է և զինված»,-հայտարարել է Հիջաբը:

Սեպտեմբերի վերջում «Ալ Արաբիա» հեռուստաընկերության եթերում Հիջաբը հայտարարել է, որ սիրիական վարչակարգը դիմանում է միայն Ռուսաստանից և Իրանից ստացվող աջակցության շնորհիվ:

«Ես այսօր հայտարարում եմ իմ հրաժարականը՝ ծառայելու այդ մարդասպան վարչակարգին»,-հայտարարել էր Հիջաբն իր փախուստից անմիջապես հետո: